Shillong, Jymmang 06: Ka Khasi Students’ Union (KSU) South Central Circle mynta ka sngi saitjaiñ kala pynbna ban pynlong da ka jingïakhih da kaba ïaid paidbah ha ka 8 tarik mynta u bnai ban pyrshah halor ka jingshah siat iap u rangbah na Laitlyngkot bala tip kyrteng kum u Roning Nongkynrih ba 35 snem, ha ki shipai Border Security Force (BSF).
“Kum shi bynta ban pynrem jur ïa kane ka jingleh riewkhlaw ki shipai BSF, ka KSU kan pynlong daka jingïaïaid paidbah haka 8 tarik mynta u bnai ban dawa pynshitom jur ïa ki shipai ba donkti ha kaba shim ïa ka jingim ki paradoh parasnam jong ngi” la ong u Assistant General Secretary ka KSU South Central Circle samla Vorrozislov Sohkhlet.
Haba kren sha ki lad pathai khubor u samla Vorrozislov ula ong ba kane ka jingleh ki shipai BSF ka dei ka jing leh riewkhlaw bad kane kala pyntieng pynsmeij ïaki paidbah ba sah ha ki thaiñ khappud.
U samla Vorrozislov ula ong ba ha ka jingshisha, ka jing buh ïa ki shipai sha thaiñ khappud ka dei ban ai jingshngaiñ ki nongshnong ka thaiñ hynrei kane ka rukom leh jong ki shipai BSF ka long ka jingsyier ïa ki paidbah jong ka dong ka thaiñ.
Ula ong ba naka liang ka KSU South Central Circle kan sa leit ban ïa kynduh ïa ki bor pulit halor kane ka kam bad kala dawa ruh ba nangne shakhmat ki shipai BSF kim dei shuh ban ïaid pahara hapoh ka thaiñ Pynursla hynrei kidei ban ïaid pahara tang ha ki thaiñ khappud bad ka ri Bangladesh.
