7 snem sahkut ka surok ba ar kilomitar shiteng, takraiñ ki paidbah ïa ka sorkar jylla

Nongstoiñ, K’lyngkot 11: Tang namar ba u kontraktor u ba ïoh ban pynbha bad siang rong ïa ka surok na Mawdiang sha Mawkyllon kaba jrong tang kumba ar kilomitar shiteng, um lah ban pyndep la hynñiew snem kynthih, ki paitbah ka thaiñ Langdongdai kata naduh Mawkyllon, Langdongdai, Mawsmai, Mawguru, Langsaw bad kiwei kiwei ki shnong kiba don ha katei ka thaiñ, ki la takraiñ tyngeh ïa ka sorkar da kaba ong ba tang namar ba u kontrator u ba pyntrei ïa katei ka surok u dei uba ïajan bha bad u bah Prestone Tynsong Symbud Myntri Rangbah ka jylla, u nud ban pynsohsat ïa ki paitbah bad ban shu pynsahteng ïa ka jingtrei haduh mynta la hynñiew snem kynthih.
U bah Birbor Riangtem secretary ka hima Nonglang Sirdarship haba ïakren bad u nongthoh khubor, u la ong ba baroh ki shnong kiba don ha katei ka thaiñ naduh Mawkyllon haduh Malangkona ki dei kiba hap ha ka hima Nonglang Sirdarship bad kum u nongpeit nongkhmih ïa ka synshar khaddar, ka khia ka shon, ka bha ka miat bad ka suk ka saiñ jong ki khun ki raïot hapoh ka hima, um lah satia ban shu sngap bad ban shu peit kai ïa ki khun ki raïot jong ka hima haba ki mad ïa ki jingeh ha kiba bun ki liang la ka long ha ka leit ka wan, ka kit ka bah bad khamtam ïa kiba pang ba shitom kiba ha ka por lyiur la hap ban kit da ki briew naduh Langdongdai haduh Mawdiang ba kin leit phah sumar ha Riangdo CHC.
U la ong ruh ba ïa ki longkmie kiba pun khun tang ban leit phah check up ha Riangdo ruh la hap ban leit on da ki rangbah kumba ar ngut lai ngut kaba la ktah haduh katta katta ïa ka trei ka ktah bad ka bylla ka sngi.
Utei u rangbah u la ong ruh ba halor ka jingbym pyndep jong u kontraktor ïa katei ka surok la bun sien bun wat, ki rangbah katei ka thaiñ ki la leit ban ïakynduh ïa ki ophisar sorkar kiba dei peit ïa ki surok hynrei haduh mynta ym shym la sei soh ei ei.
U la ong ruh ba na ka liang ki paitbah katei ka thaiñ ki la kyntu ïa ki rangbah ka hima bad ki nongsynshar shnong, ba kin khot da ka jingïalang paitbah ban ïa pyrkhat halor katei ka jingbym pyndep jong u kontraktor ïa katei ka surok. Wat lada ki hap ban shim da kano kano ka rai bad ban thaw da kiwei pat ki lad ki lynti ruh kim banse namar ki la sohsat shaba palat.
U bah Riangtem u la ong ruh ba na ka liang ki rangbah ka hima ruh ki la don ka jingïapyrkhat kumno ban thaw lad ban leit ïakynduh ïa u Myntri ka tnad PWD, ban ïakren halor katei ka surok namar lada shu sngap, ki shnong ha katei ka thaiñ kin ym ïoh surok lano lano ruh.