Shillong, Naitung, 20: Ki Pulit ka Shillong Traffic Police (STP) ki la ïoh lum pisa T. 7,68,900 lak haduh u bnai Naitung, 2023 na kaba daiñ kuna ïa ki kali bad ki thuk thukk arshaka kiba pyndait ïa ki jingpynsawa kum ki ktang pait kaba long kum ka jingpynkheiñ ïa ki kyndon aiñ kali.
Ha u kyrwoh ba la phah da u Superintendent of Police (SP) ka East Khasi Hills u Bah Sylvester Nongtnger, la ïathuh ba ki Pulit ka Shillong Traffic Police (STP) ki la pynlong ka jingtalasi ïa ki kali bad ïa ki thuk thuk ar shaka kiba pyndait thymmai ïa ki kor jingsawa kum ki ktang pait kaba la pynthut haduh katta katta ïa ki paidbah.
“Ka Shillong Traffic Police (STP) kaba la pynlong ka jingtalasi ka la ïoh bat haduh 755 tylli ki kali bad ïa ki thuk thuk ar shaka kiba pyndait ïa ki kor pynsawa kiba shu shna hi bad ïoh daiñ kuna haduh T.7,68,900 lak tang haduh u bnai Naitung, 2023,” ong u kyrwoh.
“Shuh shuh, ha ka jingtalasi kaba bud, la ïoh bat sa 17 tylli ki kali kiba pyndait da ki kor pynsawa ba la shna hi bad la daiñ kuna ïa ki katkum ki kyndon jong ka aiñ,” la bynrap u SP ha u kyrwoh.
Haba ïadei bad kane, ka Shillong Traffic Police (STP) ka kyntu ïa ki paidbah bad ïa ki trai kali ban kiar na ka jingpyndait ïa ki kor pynsawa bad ba ki dei ban phah pyndait bujli da kiba dei katkum ba la shna da ka kompeni.
Ka jingtalasi ïa ki kali bad ïa ki thuk thuk ar shaka kiba pyndait ïa ki kor pynsawa bad ïa kiba pynkheiñ ïa ka Motor Vehicle Act kan dang ïai bteng bad yn leh da kaba tyngeh ïa kiba pynkheiñ aiñ, la maham u SP.
