65.32 percent poi ki nongthep vote ha ki ar tylli ki ADC ha rilum Khasi bad Jaiñtia

Shillong, Rymphang, 21: Ki ar tylli ki Autonomous District Council (ADC) ha rilum Khasi bad Jaiñtia ki la sakhi ïa ka jingpoi ki nongthep vote haduh 65.32 percent.
Ha Jaiñtia Hills Autonomous District Council (JHADC) ka jingpoi ki nongthep vote ka long 70.99 percent katba ha Khasi Hills Autonomous District Council (KHADC) ka long 72.45 percent tad haduh ban da kut ka jingthep vote ha ka por 4 baje janmiet.
Ka jingthep vote ka la sdang ha ka por 7 baje mynstep bad ka la kut haduh ka por 4 baje janmiet ha baroh 58 tylli ki District Council Constituency, kata mar 29 tylli ha KHADC bad ha JHADC.
Hapoh ka JHADC, ka Moodymmai-Nongkroh Constituency kaba hap ha West Jaiñtia Hills District ka dei kaba poi bun eh ki nongthep vote kaba kot 90.8 percent, ka Jowai-North Constituency ha West Jaiñtia Hills District ka dei kaba poi duna eh kata tang 75.21 percent.
Ha KHADC, ka Nongspung-Sohiong Constituency ha East Khasi Hills ka dei kaba poi bun tam eh ki nongthep vote haduh 86.14 percent katba ka Jirang Constituency ha Ri Bhoi District ka dei kaba poi duna eh ki nongthep vote tang 51.46 percent.
Na ki 272 ngut ki kyrtong, 158 ngut ba kynthup ïa ki 12 ngut ki kynthei ki dei kiba don ha ka jylli ïakhun na ki 29 tylli ki Constituency jong ka KHADC bad 114 ngut ki kyrtong kynthup ïa 7 ngut ki kynthei ki dei kiba ïakhun ha ki 29 tylli ki Constituency jong ka JHADC.
Ki don haduh 13,08,818 ngut ki nongthep vote ha KHADC bad JHADC ki ban thep ïa ka vote, kata, kynthup ïa ki 6,32,347 lak ngut ki shynrang bad 6,76,467 ngut ki kynthei.
Ka KHADC ka don baroh 9,96,518 lak ngut ki nongthep voter ha kaba 4,81,268 ngut ki dei ki shynrang bad 5,15,247 ngut ki dei ki kynthei.
Ka JHADC ka kham duna ïa ka jingdon jong ki nongthep vote, kata tang 3,12,300 lak ngut ba kynthup ïa ki 1,51,079 lak ngut ki shynrang bad 1,61,220 ngut ki kynthei.
Ka jingñiew ïa ki vote kan long ha ka 24 tarik Rymphang 2025.