5th Sohra Half Marathon 2026: Lahduh u Satish Kumar bad ka Tejaswini Lambkane ha ka 21k Elite, u Wolbetstar bad ka Marqueenless ha ka 21k Meghalayan

SOHRA, Nailur 04: Ka thaiñ Sohra ka la khie im hynne ka sngi Thohdieng (04 tarik Nailur) ha kaba ka 5th Sohra International Half Marathon 2026 ka la pynkut ïa ka jingïakop da kaba pynpra ïa ka rekod jingbun ki nongïashim bynta jong ki snem ba ladep.
Ïa kane ka jingïakop la pynlong da ka Meghalaya State Olympics Association (MSOA) ha ryngkat ka jingïatreilang bad ka tnad Sports jong ka sorkar Meghalaya, ka Meghalaya Athletics Association bad ki official ba la ithuh da ka Athletics Federation of India (AFI).
Baroh ki don haduh 11,672 ngut ki nongmareh ba ïashim bynta ha ki kyrdan bapher bapher (naduh ka 21K Elite haduh ka 10K Open), kynthup ïa ki nongïalehkai bad ki nongmareh na kiwei pat ki jylla, kaba pyni ïa ka jingnangroi jong kane ka jingïakop, bad kaba pynlong ïa kane ka sienjam kaba heh tam haduh mynta.
Kaba kham sngewtynnad ka long ba ka 5th Sohra International Half Marathon ka ïoh jingithuh bad pynskhem da ka Association of International Marathons and Distance Races (AIMS).
Na ka liang jong u bah Wailadmiki Shylla, Myntri ka tnad ïalehkai ka sorkar Meghalaya, u la pynpaw ïa ka jingkylla kaba khraw jong kane ka jingïakop kaba sdang nyngkong da tang 750 ngut ki nongmareh haduh jan 12,000 ngut ki nongïashim bynta mynta u snem.
U la batai ba ki bor pynïaid ki la khang noh ïa ka jingpynrung kyrteng ban pynthikna ïa ka jingkyrshan bad ki jingdonkam kiba biang na ka bynta baroh ki nongmareh, bad kdew ba ka jingkheiñ kan jin da la kynjoh palat ïa ka 20,000 ngut da kaba suk.
Kumjuh na ka liang jong u Sukant Suki Singh, u nong India ba nyngkong ban pyndep lai tylli ki ‘200-Mile Ultramarathon’, ula ïaroh ïa ki jingtei ba kyrpang ba ïadei bad ka kam ïalehkai jong ka Meghalaya bad ka jingitynnad jong ka mariang, da kaba kdew ba ka Meghalaya kan kylla long ka nongbah ki kam ïalehkai jong ka India ha ki snem ban wan.
Ka kyrdan ïakop kaba kham kongsan jong kane ka Marathon kadei ka Elite 21km, ha kaba u Satish Kumar Verma u la khur ïa ka namjop na ki shynrang (1 kynta: 03 minit: 04 sekon), bad ka Tejaswini Narendra Lambkane ka la jop ïa ka nam lahduh ha ka liang ki kynthei (1:15:20).
Ha ka 21k Open Meghalayan, u Wolbetstar Ramsiej u la wan hakhmat duh naki shynrang (1:03:26), katba ka Marqueenless Ramsiej ka la paw kum ka nongjop na ka liang ki kynthei (1:23:55).
Ha ka ïakop mareh kaba 10 kilomitar, u Wankyrmen L Mawphlang u la jop ïa ka kyrdan 18–39 snem jong ki shynrang (28:28), katba ka Daplin Wahlang ka la pyndep kum ka lahduh naki kynthei (37:20). U Bharat Bhushan u la paw kum u lahduh ha ka kyrdan 40–54 snem jong ki shynrang (29:14), katba ka Mena Mary Wahlang ka la jop naki kynthei (41:55). Ha ka kyrdan ïakop kiba la 55 snem shajrong, u Swonding Mawlong u la jop napdeng ki shynrang (38:07), katba ka Thlingda Wanniang ka la jop na ka liang ki kynthei (45:00).
Ka khusnam pisa na ka bynta ka 21k Elite (Shynrang bad Kynthei) la pynkiew ar shah na kaei kaba la ai mynshuwa, da kaba ai Rs.3,00,000 na ka bynta ka khusnam ba nyngkong, Rs.2,00,000 ïa ka khusnam ba ar, bad Rs.1,00,000 ïa ka khusnam ba lai; bad la sam ruh ïa ka khusnam pisa kaba mar Rs.10,000 sha kito kiba pyndep ha ka kyrdan ba saw haduh ba phra.
Nalor ka 21k elite, la sam ruh ïa ki khusnam pisa ha ki kyrdan bapher bapher, ba kynthup ïa ka song pisa kaba Rs.50,000 na ka bynta ki nongjop ha ka 21km Meghalaya Open, Rs.30,000 na ka bynta ki nongjop ha ka 10km Meghalaya 18-40, bad Rs.25,000 na ka bynta ki nongjop ha ka 10km Meghalaya 40-55 bad 55-snem shajrong.