Shillong, Risaw 26 : Ka Iatyllilang SC ka la kylla long ka kynhun ba ar hadien ka Kharang SC ban jam sha ka semi final ha ka lympung ïakhun jong ka SSA 4th DIVISION Football League 2023, bad kane ka la wan hadien ba ka la pynkhyllem noh ïa ka Mawpdang SC ha ka jingïalehkai Quarter Final hynne ka Sngi Palei.
Haba phai sha kane ka jingïakhun kaba la sdang ha ka por 2 baje nohphaisngi ha madan 1st Ground SSA Stadium, ka Iatyllilang SC ka la jop salit da shi kol ïa ka Mawpdang SC.
Ka jingïakhun ka la long kaba ïakhaid bad kaba itynnat, bad ka jingïapyrshang ban pynkhihjar ka la wan na baroh arliang mamla hynrei dei lyngba u Iatyllibor Mynsong u ba la thep ïa ka shi kol ha ka 30 minit jong ka kylla step ba ka Iatyllilang SC ka la ïoh ban lamkhmat ïa ka jingïalehkai.
Haduh kaba kut jong ka por ba la buh ym shym la don shuh ba lah ban pynkhihjar kaba la pynthikna ïa ka Iatyllilang SC ban ïohrung sha ka semi final jong kane ka lympung mynta ka samoi.
Ka jingïalehkai Quarter Final mynta ka sngi kan sdang biang ha ka por 2 baje nohphaisngi ha kajuh ka madan (1st Ground SSA Stadium), bad ka jingïakhun ka long hapdeng ka kynhun Mawkriah West SC pyrshah ïa ka kynhun Mawkasiang SC ki ban ïaknieh rung semi final.
