Shillong, Lber, 19: Ka National Health Mission ka Sorkar Meghalaya ha ka sngi Baar ka la rakhe ïa ka World TB Day 2024 halor ka phang, “Yes, we can end TB.”
Ha ka jingrakhe ïa kane ka sngi, la ïashim bynta lang da u Ramkumar S Mission Director ka NHM bad Secretary ka Health & Family Welfar, Dr. F. V. Kharshiing DHS, MCH&FW cum Joint MD, NHM, Meghalaya, Dr. J. Kharwanlang State Tuberculosis Officer bad Dr. B. Shanpru, District TB Officer East Khasi Hills, ki nongtrei jong ka R. P. Chest Hospital bad kiwei kiwei.
Haba kren ha kane ka sngi, u Ramkumar S u la ong ba ka Sorkar Pdeng bad ka Sorkar Jylla ki la buh hakhmat ïa ka thong ban pynkut ïa ka jingpang TB bad da kane ka thong la ai ïa ka jingsumar kaba paka sha ki paidbah. U la ong ba dei ruh ban shimkhia bha ïa ka jingpang TB bad ïa kane ka jingpang yn sa lah ban pynkoit tang da ka jingsumar bapaka.
U la ïaiban ruh ba donkam ban leh test ïa ki briew kiba shong basah ha ki shnong nongkyndong bad ha kajuh ka por u la khot bad wer ïa ki nongïalam jong ka Village Health Council, ki nongsumar dawai kynbat, ki jaka ai jingsumar ba kin pynthikna ban pynkut noh ïa ka jingpang TB ha ka jylla bad ha ka ri.
Ka State Tuberculosis Officer Dr. J. Kharwanlang ka la ïathuh ba ki don 4974 tylli ki case jong ki briew kiba pang TB ha u snem 2022 bad 4812 tylli ki case ha u snem 2023. Ka jingleh test ïa kiba suba don jingpang TB na ka bynta shi lak ka la kiew na ka 646 lak ha u snem 2021 sha ka 1433 lak ha u snem 2023. Ka bynrap, “watla ka jingleh test ïa kiba suba don jingpang TB ka la kiew ar shah bad ka jingpyndonkam ban pyndonkam ïa ka High Quality Diagnostic Tests, ka la hiar na ka 130 lak ha u snem 2022 sha ka 124 lak ha u snem 2023, kaba pyni ïa ka jinghiar ka jingdon jong kiba pang TB ha ka jylla.”
Ha kane ka sngi, la plie paidbah ruh ïa ka C&DST Lab ka ban ai jingkyrshan ban lap bad ban sumar ïa ka jingpang TB.
Kum shi bynta ka jingpyntreikam ïa ka National Tuberculosis Elimination Programme (NTEP), la plie ruh ïa ki Regional Laboratory ha kylleng ka jylla. Ha kine ki Lab la leh ïa ka Culture and Drug Susceptibility Testing (C&DST) na ka bynta kiba don jingpang TB bad na ka bynta ki nongpang Drug-Resistant TB.
