45 sngi ai bor ka ïing Bishar HC ban pynkynriah ïa u dewiong sha jaka ba dei ban lum thup

Shillong, Lber 19 : Ka ïing Bishar High Court jongka Meghalaya ka la aipor 45 sngi ban kit lut ïa u dewiong ba pyllang ha kylleng ki jaka madan, sha ka jaka ka ban lum thup na ka bynta ban khaii noh ïa u.
Ha ka hukum ba la pynmih halor ka PIL ba shong bishar myn ha ka 14 tarik Lber, ka Full Bench ka la ong “Ngi sngew ba baroh u dewiong bala dep tih bad lum pathar ha kylleng ki jaka, la dei ban pynkit noh sha ka jaka ka ban lum thup na ka bynta ban khaïi. ïa ka bai pynkit sha ka jaka ba la buh ban lum thup lah ban pan na ki trai dewiong namar ka buh pathar ïa u dewiong ha kylleng ki jaka”.
“Shisien bala pynkit ïa une u dewiong, da kaba pyndonkam ïa ki drone kumba ai jingmut u Justice Katakey (retired), baroh kine ki jaka kin hap hapoh ka jingpeit pyrman, lada shem ïa ka jingmih biang u dewiong ha kane ka jaka, lah ban shim ïa u kum u dewiong ba tih beain kat kum ka kyndon 21 jong ka MMDR Act, 1957 bad lah ruh ban leh eiei pyrshah ïa u” ka la ong.
Halor ka jingkyrpad u Aadvocate General, ka ïing Bishar kala mynjur ban aipor 45 sngi ban pynkit ïa baroh une u marpoh khyndew uba la shu buh ha kylleng ki jaka.