Nongpoh, Lber 04: Ka Umdohkha Government LP Skul kaba dei kawei naki skul kaba la rim haka thaiñ Umdohkha kaba la seng naduh u snem 1953 kala ioh ïaka jingpynmang pisa ba thymmai kaba haduh 44 Lakh ban shna da ka skul building kaba thymmai bad 4 lakh naka bynta ki tiar ki tar naka tnad pule puthi hadien ba katei ka skul kala jot bad pei bad kaba la I sangsot ban pynlong skul khamtam haka por slap.
Ïa u mawnongrim ban tei da ka iingskul ba thymmai la leit ban plie paidbah mynta ka sngi da u Bah Mayral Born Syiem MLA ka Nongpoh kum u kongsan haka jingdonlang u Bah Balajied Ranee MDC ka Nongpoh, ka kong P L Nonglait, District School Education Officer, Ri-Bhoi, PP Yadav BMC, Umling Block, ki nongtrei naka tnad pule puthi, ki nongkitkiam bad ki Nonghikai skul, ki kmie ki kpa lem bad ki khynnah skul.
U Bah Mayralborn Syiem, kum u kongsan u la ïathuh ba kane ka jingwan ban buh ïa u Maw-nongrim ka long ban ïathuh sha ki paidbah ba ka jingtei ïa ka ïing building kaba thymmai jong kane ka skul kan sa sdang noh sa tang khyndiat por bad lyngba jong kane ka program ki paidbah kin ïoh ruh ïaka jingtip kaba shai ha kaba ïa dei bad kane ka jingtei ïa kane ka building skul kaba la donkam shikatdei ban tei thymmai ïaka iing skul kaba la jot rathai bad pei thliew.
U la ong ruh, ka jingnang jingstad ha kane ki juk mynta ka long kaba kongsan haduh katta katta, bad dei halor kane ka sorkar jylla ka phai khmat kyrpang sha ka tnad pule puthi khnang ba ki khun samla kin ïoh ïaka jingnang jingstad kaba biang.
U la ong ruh, ban nang kyntiew ïaka jylla ngi donkam ban kyntiew shuwa ïaka jingnang jingstad khnang ba kin nym don kiba sahdien.
U Bah Mayral u la kitbok ïaki nongpynïaid jong ka skul Umdohkha ba kin nangtrei shitom ban kyntiew ïaka jingnang jingstad hapoh katei ka shnong bad kumjuh ruh ki kmie ki kpa jong ki khynnah skul ba kin peit pyrman bha ïa la ki khun ki kti ba kin leit tista sha la ki skul ryngkat ka jingkyntu ïaki khynnah skul ba kin iai minot haki jingpule jong ki ban kiar ruh naki kam sniew kiba lah ban ïalam shaka jingjot.
