Nongstoiñ, Lber 04 : Ka Dorbar Shnong Langja, West Khasi Hills bad ka seng Hynñiewtrep Youth Council, hynnin ka miet sngi U Blei, ki la leit kyndang ïa ki bar jylla kiba wan trei hapoh ka Post Office jong ka shnong Langja.
Ka Dorbar Shnong bad ka HYC ki la pynlong ïa ka jingkhynra hynnin ka miet por 9 baje ei ei hapoh Shnong bad lap ïa ki katto katne ki bar jylla, kiba la wan trei hapoh ka Post Office khlem da don ïa ki kot ki sla kiba biang kynthup ka No Objection Certificate (NOC) na ka Shnong.
Ha kane ka jingkhynra, ka Dorbar Shnong ka la lap ba ki don ki briew kiba kam kum u Sordar Shnong, u ba la ai NOC tuh sha kitei ki bar jylla. La ïathuh ruh ba tang namar ka jingleh une u briew u ba kam Sordar Shnong, ka la mih ka jingïania kaba jur hapdeng ki para nongshong shnong kiba pyrshah bad kiba ïashah ïa kine ki bar jylla bad kiba la ai ïing sah wai ruh ïa kine ki briew.
Halor kane ka jingshem, ka Dorbar Shnong bad ka HYC ka la leit ban ujor da ka ejahar ha u Officer Incharge ka Langpih AD Camp pyrshah ïa une u briew. Ka Dorbar Shnong bad ka HYC ka la dawa ïa ki bor ka aiñ ba kin kem mardor ïa u ne u briew u ba leh ïa katei ka kam bymman bad ban ai ka jingpynsajia ba tyngeh.
