Shillong, Jylliew 19: Namar ka jingbun ki jingshah pynjulor ha ki bor jong u slap bad ka lyer ha kine ki sngi ba la leit noh na ka liang u Myntri Rangbah ka Jylla u Conrad K Sangma, ha ka sngi Balang ula lum ka jingïalang khmih bniah lyngba ka video conferencing, halor ka jingshlei um hapoh ka Jylla na ka jingther u slap.
Kiba la ïadonlang ha ka jingïalang ki kynthup ïa u Myntri ka Tnat Revenue & Disaster Management u Bah Kyrmen Shylla, u Chief Secretary u Bah D P Wahlang Sanjay Goyal, IAS, Commissioner &Secretary, Revenue & Disaster Management Department. Smt. M.War Nongbri, IAS, Secretary, Revenue & Disaster Management Department; Deputy Commissioners of all Districts of Meghalaya bad kiwei pat,
Ha kane ka jingialang bishar kam u Myntri Rangbah u la shim ïa ki jingkheiñ halor ki jinglong jingman ha baroh ki District bad u la pyntip ba ki lad jingïarap sha ki briew ba shah ktah ka dei ban wan hakhmat eh khnang ba kan long ka lad ban ym pynduh mynsiem ïa ki.
Na ka liang u Myntri Rangbah ha kane ka jingïalang u la kyntu ïa ki Deputy Commissioner ba kin peitngor bha ïa ka jinglong jingman khamtam eh ïa ki jaka kiba lah ban shah ktah jur khamtam ha kine ki sngi kiba ym pat lah ban thikna ïa ka jinglong ka suiñbneng.
U Myntri Rangbah u la kular bad kyntu ïa ki District ban ai ïa baroh ki jingkyrshan ba ki donkam bad bthah ba ïa ki lad jingïarap bad ki song pisa sha ki longïing ba duh ïa ki mynsiem briew bad ïa kine ki lad jingïarap dei ban pynpoi noh hapoh ka 48 kynta khnang ba kan ym pynduh mynsiem ïa kito ki longïing bad kumjuh ruh ïa ki shnong kiba shah ktah ha kane ka jingwan lyngshop ka mariang.
Ha kane ka jingther jong u lapbah ki la don haduh 171 tylli ki shnong kiba la shah ktah jur bad ki don haduh 9577 ngut ki briew kiba mad ïa ki jingshah lyngshop ka mariang bad ki don ruh haduh 135 tylli ki ïing kiba la julor jur. Nalor kane ki don 46 tylli ki surok bad jingkieng ba la shah pynjulor bad kumba 27.303 Hectre Acre ki jaka rep jaka riang kiba la julor jur.
