3rd Sohra International Half Marathon: Lahduh u Akashay bad ka Ankita ha ka Elite 21km

SHILLONG, Nailur 22: Ka jingïakop-mareh ba la ap khmihlynti bha jong ka Jylla ha kane ka samoi, ka Sohra International Half Marathon, la pynkut noh ha ka Sngi Saitjaiñ, kaba dei ka sienjam kaba lai ban pynlong ïa kane ka jingïakop mareh thong. ïa kane ka lympung la pynlong da ka Meghalaya State Olympic Association, and the Meghalaya Athletics Association ryngkat ka jingkyrshan na ka tnat Sports jong ka Sorkar Jylla Meghalaya.
U Akashay Kumar bad ka Ankita Ben Gavit ki la long ki lahduh ha ka Elite 21km (Shynrang bad Kynthei) ha kane ka 3rd Sohra International Half Marathon 2024, katba u Kresstarjune Pathaw bad ka Phyrnai Kyndait ki la long ki lahduh na ka thup jong ki nongmareh ka jylla Meghalaya na ka liang ki Shynrang bad Kynthei.
Haba phai sha ki nongjop ha ka ïakop mareh, u lahduh ha ka 21K Men’s event, u Akashay Kumar, u la lah ban pyndep hapoh 1:03:00 (shi kynta, lai minit), katba ka lahduh jong ki kynthei, ka Ankita Ben Gavit ka la pyndep hapoh 1:40:04 (Shi kynta, sawphew minit bad saw sekon), kaba la pynliem ïa kaba wan ba ar da tang ki sekon.
Haba phai sha ki lahduh ha ka 21k Meghalayan, u Kresstarjune u la lah ban pyndep hapoh 1:05:21. Katba ka Phyrnai ka la mareh pyndep hapoh 1:29:37 ban long lahduh na ki kynthei.
Haba phai sha ka 10km, u Mohd Aleem u la long lahduh na ki shynrang kiba ha ka thup 18 snem haduh 40 snem hadien ba shimpor tang 29 minit bad 19 sekon haduh kaba kut. Bud sa u Pankaj Kumar (29:22) ha ka kyrdan ba ar nangta u Skhemlang Suba ha ka kyrdan ba lai (29:50).
Ha ka thup mareh jong ki kynthei (18-40) ka jingmareh ïa ka10km, la ïohrah da ka Ibandarisha K Wanniang (41:29), bud sa ka Risalang Marwein (41:51) ha ka kyrdan ba ar, bad ka Meena Kumari Subba kaba wan ba lai (42:17).
Mynta u snem ki la don ruh ki kyrdan ïakop na bynta kiba la 40 haduh 50 snem, 50 haduh 59 snem bad kiba la 60 snem shaneng ha ka 10km.
ïa ka jingpynïaid ïa kane ka jingïakop la bud ryntih katkum ki kyndon jong ka Indian Athletics Standards bad la khmih bniah da ki heh jong kane ka synjuk (Federation). Ha kane ka kynti la sakhi ïa ka jingwan ïashimbynta palat 7200 tam ki nongmareh na kylleng ka pyrthei, kumjuh ruh ki nongmareh kiba bun na kane ka thaiñ, kiba la shimbynta ha la ki jong ki kyrdan ba ki la jied – naduh ka 21 kilo mitar, nangta kaba 10 kilo mitar, bad ka Run for Fun (kaba tang 5-Kilo mitar).
Ki jingbun ki nongïashimbynta ka pyni ba ki paidbah ki la nang sngewtynnad ïa kane ka marathon bad ka la nang khring ïa kiba bun ki briew na kylleng ka ri, katba kane ka lympung ka la sdang ban paw ruh wat shabar ri.
Tang na Sohra, ki la don palat 2000 ngut kiba la ïashimbynta ha kane ka jingïakop mareh. Ki nongshong shnong ruh ki la wan kyrshanlang ïa ki nongpyniaid jong kane ka lympung da kaba ïatreilang kum kawei haduh ka jingpynkhuid, kumjuh ruh ban phai bad ai mynsiem ïa ki nongmareh.
Ha kane ka sngi la wan kongsan da u Bah Kyrmen Shylla, Myntri ka tnat Revenue & Excise, u ba la ai jingkren ïa ki paidbah bad u la ïaroh ïa ka jingaiti jong ki ha ka koit ka khiah, kumjuh ruh ïa ka bor jong ka sport ban pynïatylli ïa ki briew.
Kiwei pat kiba la don ryngkat ha kane ka sngi ki kynthup ïa u Bah Gavin Miguel Mylliemngap (MLA ka Sohra), Bah Balajied Kupar Synrem (MLA Shella) , Bah Titos Chyne (MDC Sohra) bad u Bah Bajop Pyngrope (MDC Rambrai).
Lah ban kdew ba kane ka jingïakop mareh ka long shi bynta ka jingthmu jong ka Sorkar jylla ban kyrshan bad wanrah ïa ka jingim kaba koit ba khiah hapdeng ki nongshong shnong jong ka jylla Meghalaya, kumjuh ruh ban kyntiew ïa ka jngohkai pyrthei ha kane ka thaiñ, ka jingpynshlur ïa ki nongseng kam seng jam ha ka thaiñ, kumjuh ruh ban tei ia ka jingïadei kaba khlain hapdeng ka imlang sahlang.
Haba kyllumlang, ka song khusnam na ka bynta baroh ki kyrdan ka la kot sha ka T.40.60 lak, bad ka sorkar jylla ka la mang pisa T.2.3 klur na ka bynta kane ka jingïamareh mynta u snem.
Mynta ka kynti la sakhi ruh naduh u Myntri sorkar ka jylla Bah Kyrmen Shylla bad bun ngut ki ophisar rangbah kiba la shim bynta lang ha kane ka jingiakob mareh.