3rd Division: Jop ka Mawshbuit SC, MLP FT & Nongmensong SC

Shillong, Risaw 16: Ki jingïakhun jong ka lympung SSA SRGT 3rd DIVISION Football League 2023 kaba la long hynne ka Lah Sngi U Blei (16 tarik Risaw, 2023).
Haba phai sha ka jingïakhun kaba la sdang ha ka por 11 baje mynstep ha 1st Ground SSA Stadium, ka Mawshbuit SC ka la khur ïa ka namjop kaba suk hadien ba ka la pynliem ïa ka Pomlakrai SC haduh 4 kol.
U Iainehskhem Mawri u la ïoh ban sdang pynkhihjar nyngkong na bynta ka kynhun bad haduh kaba kut u la thep ar kol (19 & 69 minit). Nangta kiwei pat la thep da u Lurshai Wankhar ha ka minit kaba 34 bad u Charming Nongdhar ha ka 72 minit. Haba phai sha ka jingïakhun kaba ar kaba la sdang ha ka por 1 baje mynsngi ha SSA Stadium, hapdeng ka MLP FT pyrshah ïa ka Lapalang SC, ka jingïakhun ka la kut ha kaba ka MLP FT ka la jop kput haduh 7-1 kol.
Dei lyngba u Bisharlang Kharumnuid (30 min) u ba la ïoh ban thep ïa ka kol kaba nyngkong na bynta ka MLP FT nangta bud sa ka kol na u Donalius Lapang ha ka minit kaba 38. Katba u player u ba tyngshaiñ bha na bynta ka MLP FT dei u Ambrous Syngkli u ba la khyrwit haduh saw kol marwei (51, 63, 78 & 81 minit). Bad ka kol kaba khadduh ka la lyngba u Everestarly Rynjah ha ka minit kaba 83.
Ka Lapalang SC ka la ïohlad ban pynphai shi kol lyngba u Vishal Das- ha ka minit kaba 69.
Haba phai pat sha ka jingïakhun kaba lai ha ka por 3 baje ha 1st Ground SSA Stadium, hapdeng ka Gorkha Association pyrshah ïa ka Nongmensong SC, ka la kut ha kaba ka Nongmensong SC ka la khur namjop kaba suk da 4 kol.
Ka Nongmensong SC ka la ïoh ban pynkhihjar nyngkong dei na u Shemphang Myrthong tang mar ïasdang ha ka minit kaba 2 bad ruh ha ka minit kaba 36. U Mychel B Nongsiej u la ïoh ban pynbud ïa ka kol kaba lai ha ka kylla kaba ar (53 minit) bad ka kol kaba khadduh dei na u Rishanlang Myrthong ha 66 minit.
Ki jingïalehkai mynta ka Sngi Hat Majai (17 Risaw, 2023) yn sdang naduh ka por 11 baje mynstep ha 1st Ground SSA Stadium, hapdeng ka Sanmer SC pyrshah ïa ka Mawpat SC, nangta bud sa ka jingïakhun ha ka por 1 baje mynsngi ha SSA Stadium hapdeng ka Mylliem Lum SC pyrshah ïa ka Lamparing SC bad khadduh ha ka por 3 baje nohphaisngi ha 1st Ground SSA Stadium hapdeng ka Mawryngkneng SC pyrshah ïa ka PFR FA.