32 snem kynjoh ka seng samla Nongpoh Proper, angnud ban pynrhem ïa ka mynsiem shakri ha ki samla

Nongpoh, Naiwieng 07: Ka seng samla Nongpoh Proper kala pynlong ka jingkynduh lang bad lehkmen haka sngi Saitjaiñ hadien ba kum ka seng samla kala kynjoh ïa u mawmer ba 32 snem ka jingïaid lynti bad ka jingshakri ha kiba bun ki liang kum ka kynhun ki samla haka shnong Nongpoh bad ka imlang ka sahlang.
Naka liang ki nongïalam jong ka seng Samla ba kynthup ïa u Anthony Suchiang President bad Heroi Nongrum Secretary kila pynpaw ba kum ka kynhun ki samla ka shnong Nongpoh kila shim ïaka siejam ban lehkmen bad kynduh lang khrui ha katei ka sngi, ka long ban kynmaw ïaka sngi bala seng ïaka Seng Samla Nongpoh Proper, bad khamtam ïa u synñiang u bynhei jong ki nongprad lynti bad ki nongïalam barim kiba naduh mynshuwa haduh kane ka khyllipmat kiba la pynwan dur ïaka seng bad ban lum ban lang iaki khun Samla jong ka Shnong Nongpoh kum shipara.
Kila ong ruh ba kum ka kynhun ki samla ki don ka jingangnud ban pynrhem ïaka mynsiem shakri ha ki khun samla jong ka shnong la ka seng Samla bad kano kano ka bynta kaba ki don ba kin shakri naduh mynsiem khamtam ban long ki nuksa jong ki hep barit hapoh shnong poh thaw.
Katei ka jingkynduh lang ki samla ka shnong Nongpoh ka long ruh ban dang pynkhlaiñ ïaka mynsiem jong ka jingshakri khamtam ban don ka jingïajan, ka jingïa ieid kum shipara haba trei kano kano ka kam naka bynta ka bha ka miat jong ka shnong, ban khamtam ban kyntiew shalor ïaka burom jong ka shnong.