Shillong, Nailar 11 : Ka ïing Bishar High Court jongka jylla ka la buh ïa ka suo motu PIL halor ka jingtih dewiong beaiñ ha Jylla ban shong bishar bniah ha ka 31 tarik Nailar, 2026.
Ka division bench u justice HS Thangkhiew bad W Diengdoh kala shong bishar ïa ka PIL ha ka Lah Sngi U Blei.
ïa kane ka mukotduma ym shym la lah ban bishar kham hashuwa namar ka jingbym lait por ka bench.
Ka Jylla ka la aiti ïa ka kaiphod sha ka ïing Bishar ha ka Lah Sngi U Blei halor ka Interim Report ba 38 jong u Justice BP Katakey (Retd) Committee ha ka 6 tarik Naitung bad ïa ka kaiphod ba bniah jong ka Interim Report ba 39 ba la ai ha ka 3 tarik Naitung.
U Advocate General A Kumar ula batai ïa ka ïing Bishar halor ki jingpyntreikam ka Jylla ïa ki jingai jingmut jong ka Committee.
U AG ula pan jingbit ban file shuh shuh ïa ka kaiphod kaba bniah halor ka Interim Report ba 39 hashuwa ka sien shong bishar ban wan.
Ka ïing Bishar ka la ong ba ïa baroh artylli ki Interim Report yn sa kynthup lang bad ki kaiphod ka Jylla bad buh ïa kane ka kam ban shong bishar bniah hashuwa ban pynmih ïa ka hukum kaba dei.
Ka Katakey Committee kan ïa bteng ban peitngor ïa ka jingtih dewiong, jingshalan bad ki kam ba ïadei bad ka mariang kiba don jingïadei bad ka jingtih dewiong ha Meghalaya.
