Jowai, Nailar 10: Ka kynhun ïalehkai phutbol jong ka Lumshnong YWSC bad ka Khliehriat East YWSC kila ïoh ban rung syndon sha ka phainal jong ka ‘2nd Division League Stage 2025’ bala pynïaid da ka East Jaiñtia Hills District Football Association (EJHDFA) hadien ka jingjop jong ki mynta ka sngi saitjaiñ 9 tarik ha madan Artificial Ground Diengshynrum, Khliehriat.
Haba phai sha ka jingïakhun Semi Final mynta ka sngi haka jingïakhun kaba nyngkong ka Khliehriat East YWSC kala jop da 1-0 kol ïaka Lakadong Umlatdoh SSC, ïa katei ka shikol la thep da u Kobar S Swer haka minit ba 14.
Katba haka jingïakhun Semi Final ba ar ka Lumshnong YWSC kala jop da 3-0 kol ïa ka Diengshalalu SC ïa kitei ki lai kol na ka Lumshnong YWSC la thep da u Wandame Lamare haka minit ba 21, u Rida o Rupai haka minit ba 69 bad u Skemborlang Rupai haka minit ba 78.
Lyngba kane ka jingjop jong ka Lumshnong YWSC bad ka Khliehriat East YWSC kin ïaknieh ïa ka nam lahduh jong kane ka lympung ka ban long haka 18/08/2025 haka por 2 baje nohphai sngi.
