Khliehriat, Nailur 09: Ka Umlyngsha Youth bad Lakadong Umlatdoh ki la ïoh ban khur pura ïa ki lai point ha ki jingïakhun ka lympung ïalehkai kyrdan Second Division 2024 bala pynïaid da ka East Jaiñtia Hills District Football Association, ha ka Lah Sngi U Blei (9 tarik u Nailur, 2024) ha madan Artificial Turf, Diengshynrum, Khliehriat.
Haba phai sha ka jingïakhun ba nyngkong, la sakhi ïa ka Umlyngsha Youth SSC kaba la pynliem noh da 2-1 kol ïaka Khliehmyntriang SC. Ha ka jingïalehkai dei ka Khliehmyntriang SC kaba la thep nyngkong lyngba u Generous Siangshai (10 minit) hynrei ka Umlyngsha Youth SSC ka la pynïakhaid ha ka 30 minit hadien ba kum bakla thep hi u Pharki Dkhar (OG) sha kol lade shuwa ba u Eleven Biam un pynkhih ïa ka kol pynjop ha ka 44 minit.
Katba ka Lakadong Umlatdoh SCSC kala pynliem da 2-0 kol ïa ka Iongkaluh SCSC. Kine ki kol la thep marwei da u John Smill Amkhloo haka minit ba 24 bad 73 minit.
