SHILLONG, Jylliew 21: Ka Shillong Sports Association lyngba u Secretary – u Bah Dipshon Nongbri, hynne ka Sngi Thohdieng ka la wan shakhmat ban pynbna ba shen kan sa sdang noh ïa ki lympung ïalehkai na bynta ka samoi 2024 kawei hadien kawei.
Hadien ba la ïoh ban pyndep ïa ka jingkyntiap klob (Inter Club Transfer) jong ki kyrdan ïalehkai bapher bapher ka Tournament Comittee ka la rai ban sdang noh ïa ka lympung ïalehkai Under-20 Fourth Division ha ka 27 tarik mynta u Jylliew, 2024 ha SSA Stadium, Polo. U Bah D. Nongbri u la pyntip ruh ba haduh mynta ki la don haduh 29 tylli ki kynhun kiba la thikna bad kiba la dep ban ïasoh ïalade ban ïashimbynta ha kane ka lympung.
Katba ha kaba ïadei bad ka Third Division ka synjuk ka la pynkhreh ban sdang ha ka taïew ba lai jong u Naitung 2024, nangta bud sa ka Second Division ban sdang ha ka taïew ba Nyngkong jong u Nailar, 2024, ka First Division ha ka taïew ba lai jong u Nailar 2024.
Katba ïa ka Shillong Premier League kane ka lympung kan sdang ha ka taïew ba ar jong u Nailur 2024.
Hadien ba la kut baroh kine ki kyrdan ïalehkai naduh ka Fourth Division haduh SPL, ka synjuk ka la khreh ban pynlong sa ïa ka Championship League Cum Knock Out ha u Naiwieng, ha kaba la thmu ban pynïalehkai tang ïa ki kynhun ba rah namlahduh bad kiba poi kyrdan ba ar (Runners Up) ha ki lympung naduh ka Fourth Division ter ter shaduh ka SPL.
U Secretary ka SSA u la pynshai ruh namar ba ki don shibun ki kynhun ki ba dang ïaineh ha ka Fourth Division, katba ki player ki la nang palat ïa ka rta, kumta na ka liang jong ka synjuk ka la rai ban ailad ïa ki klob ban pynrung 5 ngut ki player ba la palat ïa ka 20 snem ban don bynta bad ka kynhun, hynrei tang 3 ngut ki lah ban ïalehkai ha ka Starting XI.
Ha kaba ïadei bad ki lympung lehkai Under-16 & Under-14, nangta ka Under-12 Kynthei bad Shynrang bad ka Women’s League ka synjuk ka la rai ban pynlong ha ki bnai shuti, kata hapdeng u Nohprah-Kyllalyngkot jong u snem 2024-25.
