Shillong, Nailur 24: Da ki spah tylli kali kit maw ki hiar man la sngi na Pynursla sha Dawki ban leit kit maw sha Bangladesh lyngba ka Tamabil. Katkum ka jingkheiñ ba la ïoh la ïathuh ba ha ka por ba dan shong suk ka ri Bangladesh ym duna ïa ka shi hajar tylli ki trok ki hiar kit maw sha Bangladesh ha ka shi sngi shi sngi. Hynrei mynta, hadien ka jinghuri hura kaba la mih na ka jingïakhih sorkar hangtei, ki trok ki dang rung kumba saw ne san spah tylli shi sngi.
La ïathuh ba ki don ki Seng ne ki Association kiba lum pisa na kine ki trok haduh 250 tyngka kawei ka trok ha ka shi trip. Katkum ka jingïathuh ki driver trok kit maw, ki la ong ba ka ju don ka Seng Riwar Mihngi Truck Owners and Drivers Association bad ka ju shim 250 tyngka kawei ka trok shi trip. Hynrei naduh u snem 2014 kane ka Seng kam shym la treikam bha shuh bad ka la kut ka por ba rejister ruh. Shuh shuh la kynnoh da ki driver ba ka pisa ba ju lum ka Seng na ki Kali ym ju ïoh jingkhein satia bad ym tip shano ruh la pyndonkam.
Ki driver ki la ïathuh ba wat lada ki la ujor katno katno ruh, kane ki nongialam kane ka Seng kim shym la patiaw satia. Kumta ki driver ki la mih noh na kane ka Seng bad pyniasoh noh bad kawei pat ka seng kaba kynthup lang ia ki driver jong ka Khasi Jaiñtia.
Pynban wat haba ki la mih noh na kane ka Seng, ka jinglum pisa na ki driver ka dang bteng beit haduh mynta tangba ki lum 200 tyngka kawei ka trok. Ki driver ki la kynnoh ba ïa ki bym siew ïa kane ka pisa pat kiba lum pisa ki pyndik ïa ki bad kim ailad ban leit buh maw sha Bangladesh bad lada ki ailad ruh ki ai ynda ladep kiwei pat ki trok ba siew pisa.
Din ruh ki por ba ju wan lum pisa da ki Pulit bad ki Pulit ki ju pyndik ruh ïa ki kali bym siew ïa ka 200 tyngka da kaba bat ïa ki trok bad thlia laiphew jait.
