Nongpoh, Ïaïong, 24: Ka Tnat Pule Sociology jong ka University of Science and Technology Meghalaya (USTM), ha ryngkat ka jingïatrei lang bad ka RC-30: Digital Sociology (Indian Sociological Society) lem bad ka Forum for Learning and Action with Innovation and Rigor (FLAIR), New Delhi, ka la pynlong ïa ka prokram kaba ar sngi kynthih ba la tip ai kyrteng, ““Dimensions and Relevance of Social Ethics for Contemporary Society” kaba la sdang ha ka 22 tarik bad pynkut noh ha ka 23 tarik u Ïaïong 2025 hapoh katei ka skulbah.
Ha kane ka prokram la don ryngkat ka Prof. Maitrayee Chaudhuri, kaba dei ka President Indian Sociological Society; u Prof. Abdul Matin, Convenor ka RC-30-ISS bad President ka FLAIR; Prof. Sambit Mallick, ba wan mihkhmat na ka Department of Humanities and Social Science, IIT Guwahati; u Prof. G.D. Sharma, Vice Chancellor ka USTM; u Prof. R.K. Sharma, Advisor ka USTM; bad Prof. Thagiram Gogoi, Dean ka School of Social Sciences and Humanities, USTM lem bad kiwei kiwei de.
Ha kane ka prokram ai jinghikai la wan ban ai jingkren da ki nongkren kiba dei na ka ri bad wat na shabar ka rib a kynthup ïa u Dr. Paul Streumer na Netherlands, u Md. Habibur Rehman na Bangladesh, u Prof. B.P. Sahu, Dean ka Department of Adult and Continuing Education, NEHU, Meghalaya; u Prof. Nirakar Mallick na ka Department of Sociology, Assam University, Silchar; bad u Prof. Subhas Chandra Roy, uba dei u Dean barim ka North East Regional Institute of Education (NERIE), NCERT, Meghalaya.
Ki Phang ba la ïakren ha ka jingaihikai ki kynthup ïa ka jingïadei jong ka rukom im kaba dei ban bat ïa ka hok ha ka long briew ka man briew, ka rukom treikam ha ka kam shakri paidbah na ka bynta ki samla, ka jingpynkhreh ïa ki rukom treikam na ka bynta ki riewshimet ba trei ha ka kam shakri paidbah, ka jingpyrshang ban pynkhraw ïa ka kam kaba ngi trei ban poi sha ka jingjop bad kumjuh ruh ka thong ban wan rah ïa ka jingïatylli ba ngin long kita kiba don bynta haba shim ïa kano kano ka rai kaba ai jingmyntoi ïa imlang ka shalang.
