Shillong, ïaïong 08: Ka The Meghalaya Football Association hynne ka sngi Balang ka la pyntip ba ka jingïalehkai ba nyngkong jong ka lympung ‘5th Meghalaya State League (MSL 5), kan sdang da ka jingïakhun hadpeng ka Nongkseh SSCC pyrshah ïa ka Khimusniang SC kaban long ha madan First Ground-SSA Stadium , Polo, kaba la buh ban long ha ka 15 tarik mynta u bnai Ïaiong.
Kane ka jingiakhun kaba dei jong ka Group A kan sdang ha ka por 5 baje janmiet, ha kaba u Myntri ba dei khmih ïa ka tnat Sports & Youth Affairs u bah Wailadmiki Shylla un long kum u kongsan.
Lah ban kdew hangne ba ka Nongkseh, kum ka kynhun, kadei kawei na ki klob kaba la sdang bha ba kan khring ïa ki khmat u paidbah nongpeit kai, hadien ka jinglah ban paw bad ban ïalehkai bha ha ka samoi ïalehkai jong u snem 2025, da kaba jop ïa ka First Division, hadien kane ka la rah pat ïa ka nam lahduh jong ka Champions Cup, ba la pynlong da ka Shillong Sports Association.
Katba na ka liang jong ka Khimusniang, kane ka kynhun kan pyrshang ba kan lah ban ïoh ïa ka jingsdang ba paka, katno tam lei lei hadien ba ka la ïoh ba kan rah ïa ka nam lahduh jong ka lympung ‘U Kiang Nangbah Memorial Trophy ka West Jaintia District Sports Association’s Super Division’ ha ka samoi ïalehkai u snem 2025.
Kane kan dei ka sien ba nyngkong ïa kine ki artylIi ki kynhun ba kin ïakhun pat sa ha kum kane kawei ka lympung bah ïalehkai phutbol kaba heh ha ka jylla, ïa kaba la pynïaid da ka MFA ryngkat ka jingkyrshan na ka Directorate of Sports and Youth Affairs jong ka Sorkar jylla.
Mynta ka kynti, ka MSL kan long kaba kham kyrpang namar jia ryngkhat ba la pynlong ïa ka, ha ka khep ba kum ka synjuk ka MFA ka rakhe ruh ïa ka Golden Jubilee.
Ha ka jingshisha, ka MSL-5, la thmu ban sdang ïa ka ha kane ka sngi Saitjaiñ jong ka taïew, hynrei ka Centralised Registration System (CRS) ka All India Football Federation’s (AIFF) ka la kham pynjlan noh ïa ka por sdang.
Kaba kham sngewtynnad ban tip hangne ka long ba ha ki saw samoi kiba la dep, ki kynhun ne klob ba rah ïa ka nam lahduh ki long ba ïapher, ha kaba la rah nyngkong ïa ka da ka Niaw Wasa United ha 2017-18, Shillong Lajong (2019), Rangdajied United (2023) bad Mawlai (2024-25).
Kumta baroh ar, ka Nongkseh bad ka Khimusniang kin thmu ban khur ïa ka resol kaba bha ha kane ka jingïalehkai ba nyngkong jong ka MSL 5 ha ka 15 tarik u ïaïong katba ki dang sdang ïa ka jingïakhun jong ki ban long ka lahduh jong ka Meghalaya.
