10 sngi ai por ka AJMRWLU ïa ka Sorkar MDA bym hun ïa ka jingpynkiew dor bainong sngi

0

Shillong, K’ Lyngkot 16: Ka All Jaiñtia Muster Roll Workers & Labour Union (AJMRWLU) ha ka sngi Palei ka la byrngem ban pynjur ka jingïakhih jong ki lada ka sorkar kam lah ban bishar biang ïa ka rai ba dangshen ban pynkylla ïa bai bylla na ka dor kaba rim ne basic rates of minimum wages ha Meghalaya, ha kaba katkum ka jingong jong ki ka dei ka bym ïahab shuh ba ka jingkiew dor ki mar ki mata.
Ha ka shithi ba la phah sha u Myntri Rangbah ka jylla u Conrad K Sangma, u President ka AJMRWLU u Bah Dayowanphi Iakai u la ong, “Ngi kwah ban pynpaw ka jingbym hun jong ngi haba ïadei bad ka rai jong ka kynhun myntri kaba dangshen ban bishar biang ïa ka bai bylla ne ka minimum wage ha Meghalaya.”
“Ki jingdawa jong ka union ban bishar ban khmih bniah bad ban pynbeit ïa ka dor jong ka bai bylla dei ban pynbna hapoh ki 10 sngi. Ïa ka dor kaba mynta dei ban pynbiang ka ban pyni ïa ka jingkyntiew kaba shai, da kaba pyrkhat lang ïa ka jingkiew dor ki mar ki mata bad ka dor kaba long T. 300 kaba la pynkylla ha ka 1 tarik u bnai Risaw, 2018 bad kaba kynthup ïa ka dearness allowance kaba long hapdeng ka snem 2019-2024 na ka bynta baroh ki kyrdan jingtrei bad ka jingkyntiew ïa ka dor na ka bynta ka jingpynkylla thymmai ïa ka floor basic rate, ban ïoh ïa ka dor kaba dei jong ka revised floor basic rate,” ong ka seng.
“Ka jingbym lah ban pynbeit ïa kane ka kam hapoh ka por ba la buh kan pynbor ïa ngi ban pynlong da ki jingïakhih kiba jur ha baroh kawei ka jylla khnang ban pynurlong ïa ki jingdawa jong ngi. Namar kata ngi kyrpad ïa ka jingtuklar ba mardor jong phi halor kane ka kam ban pynthikna ban ïoh ïa ka hok bad ka jingkhuid na ka bynta jong baroh ki nongtrei,” bynrap u president.
Ha ka shithi, ka union ka la kdew ba kine ki dor ba la pynskhem kam long ha ka rukom kaba dei, bad kam shym la long katkum ka jingïadei bad ka jingkiew dor ki mar ki mata bad kam long ruh ruh katkum ka jingkheiñ kaba biang katkum ka nongrim jong ka floor rate, kaba dei ban long katkum ka dor T. 300 shi sngi kaba long katkum u snem 2018, ha ka jaka T. 419 na ka bynta u snem 2024.
Ka la ong ba ka dor kaba la pynkiew ha ka 1 tarik u Risaw, 2018 ka dei na ka bynta ki unskilled worker kaba dei na ka dor T. 196 sha ka T. 300 kaba la kyntiew da ka T. 104, na ka bynta ki semi-skilled worker ka dei T. 208 sha ka T. 340 kaba pyni ïa ka jingkiew kaba long T. 132, ki skilled worker la kyntiew na ka T. 220 sha ka T. 380 kaba la kiew T. 160 bad na ka bynta ki highly skilled worker la kyntiew na ka T. 244 sha ka T. 420 kaba kiew kumba T. 176.
Ha kawei ka liang ka dor ba la pynkylla halor ka floor basic rate ba la mynjur da ka kynhun Myntri ha ka 10 tarik u Kyllalyngkot, ka dei na ka bynta ki unskilled worker na ka T. 419 sha ka T. 525 kaba ka kiew kumba T. 106, ïa ki semi-skilled worker na T. 474 sha ka T. 565 kaba kyntiew kumba T. 91, ïa ki skilled worker na ka T. 530 sha ka T. 605 kaba la pynkiew ka long 75 bad na ka bynta highly skilled worker la kyntiew na ka T. 586 sha ka T. 645 kaba la kiew sha ka 59.
“Ka long ka sakhi ba kane ka jingkyntiew ka la pynhiar na ka unskilled sha ka kyrdan highly skilled, kaba long shisha ki bym lah ban pdiang,” ong ka union.
“Kumba long naduh mynswa, ka jingkyntiew ka long pdeng ha baroh ki kyrdan, kaba pynthikna ïa ka jinglong khuid bad kaba don ka jingïadei bad ka rukom long ka kam bad ka skill level kaba long katkum ka jingïadei bad ka minimum wages Act, 1948 kaba la shim ïa ka 1 tarik u Risaw, 2023 kum ka tarik kaba treikam kaba long katkum ka floor basic rate kaba dei ban pynkylla hapoh ki 5 snem naduh ka tarik ba khatduh jong ka jingpynkylla kaba la leh dang shen,” ong shuh shuh ka seng.

Leave A Reply

Your email address will not be published.