Shillong, Naiwieng 29 : Ka sorkar Meghalaya ha ka sngi Balang ka la buh thong ban shna pyndep haduh 1,40,000 tylli ki iing baduk mynta u snem ïa kiba la bhah da ka sorkar pdeng ba la tip kum ka Pradhan Mantri Awaas Yojana (PMAY). Haba pyntip ïa kane hadien ka review meeting ha kane ka sngi Balang, u Myntri Rangbah u la ïathuh ba kane ka snem kadei ka snem kaba kyrpang bha na bynta ka Meghalaya haba ïadei bad katei ka skim PMAY.
“Lada ïa nujor bad ki saw snem mynshwa, ka thong jong ka jylla ka long kumba 40,000 – 50,000 tylli ki iing ba duk hynrei tang mynta u snem 2023 – 24, ngi la buh thong haduh 1,40,000 tylli,” ong u Myntri Rangbah haba kren bad ki lad pathai khubor.
Shuh shuh u la ong ruh ba kane ka urlong namarba ka sorkar ka shimkhia bad ka sorkar India bad ruh ryngkat ka thong ban pyndep noh ïa kito ki iing ba dang sahteng kiba la don ha ka thup.
Da kaba kam ba ka sorkar ka la pyllait bun bha kapisa, u Myntri Rangbah u la ong ruh, “Ngi sngewkmen ban pyntip ba ka sorkar India ka la ai ka jingïatrei lang bad haduh mynta ngi la dep ban pyllait pisa ha ka sien kaba ar bad kumba 800 klur tyngka la dep ban pynlut bad jan baroh kitei ki ïing mynta ki la sdang bad shen ngin sa ïohi ba ka kam kan sdang noh ha baroh.”
U Myntri Rangbah ryngkat ka jingsngewskhem ban kot sha ka thong, u la ong ruh ba ha kane ka samoi trei mynta ki don ka jingtikna ba kin lah ban pyndep noh ïa kitei ki 1.40 lak tylli ki iing bad lada ki lah shisha kan long ka jingjop kaba khraw ïa ka tnad bad ïa ka sorkar hi baroh kawei bad kaban pynmyntoi eh ka long ïa ki paidbah ba kin ïoh ïa la ki jong ki iingsah.
Ha kane ka sngi u Myntri Rangbah u la pyntip ruh ba ka sorkar ka la thung ruh da u Mission Director ban peit na ka bynta ka jingpyntreikam stet ïa katei ka projek bad ïa u MD yn sa ïarap lang da ki arngut ki assistant mission director.
Nalorkine, kin don ruh ki ADC ha manla ki distrik ban peit bad la bthah ruh ïa baroh ki DC bad BDO ba kin leit jngoh la kumno arsien sha ki shnong bad block bapher bapher ban buddien ïa ka jingpyntreikam ïa kitei ki iing.
