Shillong, Naiwieng 29 : Ka Sorkar pdeng bad ka Sorkar Manipur ki la ïasoi ïa ka Soskular kren ïasuk bad ka United National Liberation Front (UNLF), ka kynhun kieng atiar kaba rim duh ha ki thaiñ ri – thor jong ka Manipur ha New Delhi mynta ka sngi. ïa ka UNLF la sdang naduh u snem 1964 bad ka la treikam hapoh bad shabar ka ri India. Kane ka jingïasoi soskular kan ïarap ban wanrah jingshongsuk ha ka thaiñ shatei lammihngi bad khamtam ha Manipur.
U Myntri Sorkar Pdeng ba dei khmih ïa ka tnat Kam Pohïing bad Cooperation, u Amit Shah u la ong ba kane ka long u mawmer ba kyrpang ha ka histori. Ha ki post jong u ha ka ‘X’, u Myntri ka tnat Kam Pohïing u la ong ba kane ka long ka jingjop kaba khraw kaba pynurlong ïa ka jingthmu jong u Myntri Rangbah Duh, u Narendra Modi ba kan don ka roi ka par kaba ryntih bad ruh ka lawei kaba kham bha ïa ki samla jong ka thaiñ shatei lammihngi. U Mynti u la ong ba u pdiang ïa ka UNLF sha ka synshar paidbah bad u la kitbok kitrwiang ïa ki ha ka jingïaid lynti jong ki ban wanrah pat ia ka jingshongsuk bad ka roi ka par.
Katkum ka jingthmu jong u Myntri Rangbah Duh, u Narendra Modi bad hapoh ka jingïalam jong u Myntri ka tnat Kam Pohïing u Amit Shah, ka Sorkar pdeng ka la ïasoi ïa ka soskular bad ki seng kieng atiar na ka thaiñ shatei lammihngi naduh u snem 2014 ban pynkut ïa ki kam lehnoh bad ban kyntiew ïa ka roi ka par.
Katba ki la don ki jingpynbeit bad katto katne ki kynhun kieng atiar na ka thaiñ shatei lammihngi kum shi bynta ka jingwanrah ïa ka jingshongsuk da ka Sorkar pdeng ha ki por ba la dep, kane ka dei ka sien kaba nyngkong ba ka kynhun kieng atiar na ka ri thor jong ka Manipur ka la rung biang ha ka imlang sahlang da kaba kyntait ïa ka jingïaum snam bad da kaba pdiang ban bat ïa ka Riti Synshar jong ka Ri bad ki aiñ jong ka ri. Kane ka jingïasoi soskular kan pynkut ïa ki jingïa umsnam hadpeng ka UNLF bad ki kynhun pahara ha kaba kiba bun ki la duh ïa ka jingim ha palat sanphew snem bad ka plié lad ruh ban pynbeit ïa ki
jingshong syier jong ka imlang sahlang. Yn sdang ïa ka Peace Monitoring Committee (PMC) ka ban peit ïa ka jingpyntreikam ïa baroh ki kyndon ba la ïakut. Kane kan long shisha ka sienjam kaba heh ha ka jingwanrah ïa ka jingshongsuk ha kane ka Jylla.
ïa kane ka jingïasoi soskular la ïasoi ha New Delhi da ki ophisar ka tnat Kam Pohïing jong ka Sorkar Pdeng bad ka Sorkar Manipur bad ruh ki nongmihkhmat na ka United National Liberation Front.
