Shillong, Nailar, 07: U Nongïalam ka Liang Pyrshah ha Iing Dorbar Thawaiñ ka Jylla, Bah Ronnie V Lyngdoh u la ïathuh ba ka party jong u kan sa kren bad ka sorkar Meghalaya bad kumjuh bad ka sorkar Assam ban pyntikna ïa ka jingshngain bad ka jingïada na bynta ki paidbah kiba sah ha ki arliang khappud.
“Ngin sa rah ïa kane ka mat bad ka Sorkar Pdeng bad kumjuh bad ka sorkar Assam bad Meghalaya ban pyntikna ba ki paidbah kiba sah ha khappud kin don ha ka jingshngaiñ bad ba kin im ha ka jingtieng bad ka jingduk,” u la ong haba kren bad ki lad pathai khubor.
Katei ka jingkren jong u kadei hadien ba ka jingmih ka jingkynnoh ba ka don ka jingthombor ïa ki paid Khasi-Pnar ba sah ha Block-I ha ka kynhun jong ka United People’s Front of Karbi Longri (UPFKL).
Halor kane ka jingjia, na ka liang u Myntri ka tnad Kampohiing ka jylla, Bah Prestone Tynsong u la ong ba kam dei satia kaba suk ïa ka Meghalaya ban phah bor pahara shaduh Block I namar kadei ka jaka ba hap ha ka jingpeit jong ka Assam.
Hynrei halor kane, u Bah Ronnie, u la ong ba ka jubab kam dei satia da ka jingpynibor hynrei da ka jingpynbeit.
“Ngi donkam ban ïoh ïa ka jubab kumno ban weng ïa katei ka jingeh hapdeng ka Meghalaya bad Assam. Ka jingpyni bor kan ym lah satia ban weng ïa ki jingeh. Nga ngeit ngi donkam ban ïa syllok bha khnang ba ngin dup lah ban weng namar lada phi pyni bor ki ruh kin pyni bor bad kumta kane kan ïai bteng bad kiban jynjar dei ki paidbah,” u la ong.
Shuh shuh u ong ruh ba ka lynti kaba suk eh ka long ban ïa shong syllok lang bad pdiang ruh ïa ka jingïashim ïa ai kylliang da ka lynti ban pyntikna ba ki paidbah ba sah ha ki khappud jong ki jylla kin don pat ha ka jingsuk jingshngain.
Dang ha ka taiew ba la dep, u Myntri Rangbah u la kren bad u Myntri Rangbah ka Assam, u Himanta Biswa Sarma halor ka jingkynnoh ba ka don ka jingthombor na ka kynhun ba tip kum ka United People’s Front of Karbi Longri (UPFKL) pyrshah ïa ki paid Khasi – Pnar kiba sah ha Block – I.
Na ka liang u Conrad u la pyntip ruh ba ka la don ka jingtyrwa ba ka jingleit jurip lang ïa kitei ki jaka khappud kan long ha ka 15tarik mynta u bnai.
Ha kawei pat ka liang, u Bah Ronnie uba dei ruh u MLA jong ka Mylliem u la ong ruh ba ka jingjïa ha Mahadev Khola kam dei satia ban wan pat ha ka dur jong ka jingïa kynad niam lane ka jingsngewpher jaidbynriew. U ong ruh ba kitei baroh ki mih tang naka daw ba ki don ki riew shimkabu kiba leit ban thombor ïa ki nongshong dukan hangtei. Kumta u la banjur ïa baroh ba kim dei ban peit ïa katei ka jingjia kum ka jingjïa sngewpher niam.
