Nongstoiñ, Nailar 7: Ka kynhun ki runar ba la tap khmat, ki la leit thombor ïa ka shlem treikam jong ka kompani ba shna ïa ka surok Nongstoiñ-Wahkaji bad wiang ding ïa kawei ka trok dumper bad kawei ka transit mixer jong ka kompani.
Kane ka la jia ha ka step phyrngap Lah u Blei ha ka por 1:30 baje eiei ha ka jaka sah jong kane ka kompani kaba don ha ka shnong Mawthungkper.
Katkum ka khubor, ki Pulit ki la ïoh ïa ka jingtip ba u Projecr Manager kane ka kompani, ba lai ngut ki briew ba la tap khmat ki la wan rung sha kane ka jaka jong ka kompani bad wiang ding beit beit ïa ki ar tylli dumper trok bad kawei ka Transit Mixer.
Ki ïathuh ba u nongñiah jong kane ka trok uba thiah hapoh, u la kyndit na ka jingwan par ka jingkhluit na ki bynta ba shapoh jong ka trok bad haba u la khie, u la khynñiat ïa ka jingkhang jong ka kali ban pyllait im ïalade bad kane ka jingkhang ka la dei ïa uwei na kine ki runar u ba ieng shabar ka trok.
La ong ba kine ki runar mar kumta hi ki la phet krad na kane ka jaka.
Ki Pulit ki la register case halor kane ka jingjia bad ka jingtohkit mynta ka la ïaid shakhmat.
