Nongpoh, Nailar 07: Ka Synjuk ki Rangbah Shnong Ri-Bhoi District mynta ka sngi kala lum lang ïaki nongïalam jong ki Village Employment Council (VEC) jong ka Jirang bad Umling Block ha ïing Dorbar Iewmawlong ban ïa tai sani halor ka jingeh ban pyntyllun ïaki kam shnong bad ki jingtrei jong ka skhim MNREGA namar ka jingpynslem jong ka sorkar ban pynlait ïaka pisa ban thied ïaki tiar ki tar bad ki jingdonkam (Material) la bun snem.
Haba kren sha ki lad pathai khubor naka liang u Bah PB Sylliang Secretary ka Synjuk ki Rangbah Shnong Ri-Bhoi haka jingdonlang u Bah BB Makdoh Chairman bad kiwei kiwei ki nongïalam, u la ong ba ba kum ka synjuk kam banse shuh ban shim da ka rai ban ujor syndon da ka PIL sha ka ïingbishar ka Meghalaya High Court pyrshah ïa ka Sorkar Jylla, halor ka jingleh mynthi ban pyllait noh ïa ka pisa kiba pyntreikam na ka bynta ki skhim bapher bapher jong ka skhim MGNREGS ha Ri Bhoi District.
U la ïathuh ruh kumba long haduh mynta, ki Village Employment Council (VEC) ki hap ban mad ïa ka jingeh ha kaba pyntreikam ïa katei ka skhim ka Sorkar Pdeng bad ka daw ka long ba ka sorkar ka pyllait tang ïa ka pisa ban siew sha ki Job Card Holder bad katba ïa ka pisa kiba hap ban thied ïa ki tiar ki tar ka la pynsahkut mynta la ar snem kynthih bad kane ka la wanrah ïa ka jingdkoh ha kaba pyntreikam ïa kane ka skhim ka Sorkar Pdeng.
U la ong ruh ba haduh mynta ki don ki VEC kiba la sahkut kumba 5 snem ka pisa PMC kaba la mang naka bynta ka bai leit bai wan bad ki jingdonkam jong ki Chairman bad Secretary ka VEC, hynrei haduh mynta kim pat ioh satia kaba la buh jingeh ïaki nongïalam ka VEC ban pyndep ïaki kam ki jam.
Ha kaba ïadei bad ka jingbthah ban buh da ki Skilled bad Semi Skilled, donkam da ki misteri kiba don ka jingnang jingtip ban shna ïaki jingshna naduh ka kynroh bad kiwei kiwei, hynrei kaba sngew lyngngoh ka long ba ka bai bylla jong kitei ki misteri hap ban siew da ka bai tiar kaba la buh jingeh ïaki VEC, bad naka liang ki nongïalam ka VEC kila ai jingmut ruh bad kyrpad sha ki Block ba dei ban pynduh noh ïaki Skilled bad Semi Skilled.
Shuh shuh namar ka jingpynslem jong ka sorkar ban pynlait ïaka pisa, ym don shuh ba ba lah ban kyrshan ïaki tiar trei sha ki VEC, bad lada ki VEC kim shim ïaki Work Order ruh ki shah pynbor haki BDO ba kidei ban shim bad kane kala buh jingeh shisha ïaki VEC bad haka juh ka por naka liang ka Synjuk kala kyrad ruh sha ka sorkar ba ka dei ban pymim biang ïaki Area Employment Council, namar bun naki EAc mynta kim treikam shuh bad I kumba ka sorkar kala shu pynsyrwa kai ïaka pisa ban tei ïaki building bad kiwei kiwei.
Kumba bun naki Rangbah Shnong khamtam ki shnong ba jngai na sor, kim don ïaki network ba biang, ki shem jingeh shisha ban phah ïaki attendance jong ki nongtrei jobcard namar ba naka liang ka sorkar kala phah ban leh online, halor katei ka bynta naka liang ka Synjuk ka kren shai sha ka sorkar lada ka kwah ban kloi ka kam bad ban leh online pynbiang shuwa ïaki network mobile sha man la ki shnong bad lada kam lah kan bha ban leh biang kumba leh mynshuwa da kaba leh offline.
Halor katei ka jingeh ki VEC bad ki Shnong ban pyntreikam ïaka skhim MNREGA naka liang ka Synjuk kan sa leit ruh ban ïakynduh ïaki nongïalam ka VEC ba hap ha Umsning bad Bhoirymbong Block ban shim lang kawei ka rai.
