Shillong, Nailar, 07: Lai ngut ki briew ki la duhei ïa la ka jong ka jingim hadien ba kawei ka trok kit muid kaba don ïa u nombar ML05 G 9528 ka la thung baji ha kawei ka riat kaba jylliew haduh 300 mitar eiei ynda poi ha Lad Mawkhap, kaba hap hapoh ka Pynursla Civil Division, East Khasi Hills District.
U Superintendent of Police ka East Khasi Hills District u Bah S. Nongtnger ha u kyrwoh ba la phah sha ki lad pathai khubor u la ïathuh ba ha ka miet sngi u Blei kane ka trok ba la ñiah da u Yomiki kharshandi, 20 snem ka rta kaba kit 12 tylli ki muid, ka la sniew kynsan tang shu poi ha ka shnong Langkyrdem katba ka dang wan phai na Pynursla ban leit sha Laitlyngkot.
Ynda la poi ha khongdong surok ba ju tip kum ka Khoh-yiar hajan Mawkhap ha surok National Highway-40, kane ka trok ka la sniew bad tyllun shadien bad hap syndon jraiñ sha riat.
Ka kynhun Search and Rescue Team (SRT) jong ka tnat Fire and Emergency Service, (F&ES) Shillong tang shu ïoh jingtip halor kane ka jingjia ki la leit mar mar ban leit ai jingïarap ïa kine ki lanot.
La ïathuh ba u Bah Bansiew Khongklian na ka shnong Phlangshlain u la par dohim dohïap na trai ka riat haduh ban da poi tiap shajrong surok katba ïa u Bah Yomiki kharshandi la lap da ka kynhun SRT ba u dang im bad shu thiah lyngktop hapdeng ka jingmynsaw jong ki kjat na ka jingjngai kaba 50 mitar na ka jaka ba la hap ka trok.
Lai ngut kiba la khladnoh ha ka jinghap jong kane ka trok ki dei kiba la tip kyrteng kum u Kyndaiborlang Kurbah na Kseh Mawnai, u Banpeitlang Marbaniang na Nongshken Mawdang bad u Welbokstar Sohlang na Kseh Mawnai.
Ha kaba ïadei bad kane ka jingjia ki pulit ki la register case ha Pynursla Police Station.
