Shillong/Jowai, Nailar 07 : Ka tnad ka Koit ka Khiah jong ka jylla hynne ka sngi ka la sdang ïa ka jingai tika ïa ki khunlung ba hapoh san snem ki bym pat ïoh tika bad kumjuh ïa ki longkmie ba armet ïa kaba la tip kum ka ‘Intensified Mission Indradhanush 5.0’ (IMI 5.0) ha kylleng ki bynta jong ka jylla.
Ha Shillong, da ka jingtrei lang bad ka ophis u DHS (MCH & FW) ïa katei ka jingai tika la pynlong ha Diengpasoh PHC ha kaba u MLA ka Mawryngkneng Bah HS Kharpran u la long u kongsan. La donlang ruh ha kane ka sngi naduh ka DC jong ka East Khasi Hills Kong RM Kurbah, IAS, Dr R Allya, DHS(MCH), Dr A Lyngdoh, DMHO, Dr. E L Kharmutee, DMCHO, Dr V Laloo, Dr A Lyngdoh, M&HO ic Diengpasoh PHC, BMO, CDPO, National Observer, ki heh na ka WHO, JSI, UNDP, bad ruh ki heh sorkar na ka distrik bad Block, ki dkhot ka VHC, ki ASHA, AWW, ki kmie ki kpa bad ki paidbah.
Jowai : Ka Additional Deputy Commissioners ka West Jaiñtia Hills District ka kong HML Kynta mynta ka sngi ka la plie ïa ka prokram ai injekshon na ka bynta ki khynnah khunlung bad ki longkmie ba pun khun kaba la tip kum ka ‘Intensified Mission Indradhanush 5.0’ ha ka jingïalang ba la long MCH Hospital, Panaliar, Jowai.
Na ka liang ka kong HMK Kynta kum ka konsan haba ai jingkren kala pynkynmaw ïa kane ka prokram ai injek yn sdang ïa ka naduh mynta ka sngi, la pyntip ruh kino kino kiba ba donkam ban ïoh injekshon ki lah ban leit mih sha ki jaka sumar sorkar khlem donkam jingsiew.
Ha ka juh ka por ka kyntu jur ïa ki kmie ki kpa ba kin shim ïa kane ka kabu na ka bynta ka jingkoit jingkhiah jong ki khynnah khunlung bad kymjuh ïa ki longkmie ba pun khun.
Ha kane ka sngi la ïoh jingbatai bniah shapang ki jait injekshom ïa ki khunlung ba kin lait na ki jingpang bapher bapher da u Dr. E.Suchiang, Pediatrician, Jowai, ula ong ruh katba lah ym dei ban ïaidlaid ïa ki dawai ai injekshon kiba dei ban ïoh naduh ka por ba pun ïa ki khunlung hapoh kpoh bad haduh ba la kha ïa ki khunlung kiba hap ban bteng ïa ka injekshon katkum ka jingbthah jong ki Doctor.
Na ka liang ka Dr. Helen Uriah, District MCH Officer, Jowai kaba batai shaphang ka jingdonkam jong ka (MCP Card), bad kane ka Card kan ïarap ïa ka rukom ai injection ha ka por ba wan mih sha ki jaka sumar, shuh shuh kala batai ba kane ka IMI campaign ka don haduh lai bynta (three phases) kaba nyngkong naduh 7 tarik u August haduh 12 u August, Second phases 11 tarik u September haduh 16 September bad 9 tarik u October haduh 14 October, 2023 da kaba kyntu jur ïa baroh ban ïashim bynta.
Ïa ka prokarm ha kane ka sngi la pynïaid da ka Dr. (Mrs) M Syngkon, District Surveillance Officer katba ïa ki kyntien ai khublei la ïoh na u Dr. E. War, Medical Superintendent, MCH Hospital, Panaliar, Jowai.
