Ka tnat Pulit kam dei ban ym ailad ïa ki runar ban pynthud ïa ka shongsuk shongsaiñ: UDP

Shillong, Nailar, 07: U President ka United Democratic Party (UDP) Bah Metbah Lyngdoh ha ka Lah Sngi u Blei u la kyntu ïa ka tnat Pulit ba kan ym ailad ïa ki runar ba kin pynthud ïa ka shongsuk shongsaiñ ha ka jylla.
“Ki Pulit ki hap ban long kiba husiar bad kim dei ban shu shim sting bad ban ailad ïano ïano ruh ban pynthud ïa ka shongsuk shongsaiñ. Ki Pulit ki donkam ban long kiba peitngor baroh arphew kynta namarba ka dei ka bynta jong ka shongsuk shongsaiñ ki paidbah ha ka jylla,” ong u Bah Metbah ha ka jingïakren bad ki lad pathai khubor haba pynpaw ïa ka jingjia ba dang shen ha Tura, ha kaba katkum ka jingsngew jong u, kane ka jingjia ka la buh jingma wat ïa ka jingim jong u Myntri Rangbah ka jylla u Conrad K. Sangma.
“Namarkata, ka tnat Pulit ka dei ban kham peitngor bad ban long kaba pynkhreh lypa bad ki hap ban pynkhlaiñ ruh wat ïa ka tnat syntiat. Ngim dei ban shu shong kli kti tang namarba ka jylla Meghalaya ka dei kaba shongsuk shongsaiñ. Ngim dei pat ban ailad ïa kino kino ki riewshim kabu kiba pynthud ïa ka shongsuk shongsaiñ ha ka jylla,” u la bynrap.
Haba pynpaw ïa ka jinglong jingman ha baroh kawei ka jylla, u Bah Metbah uba long ruh u Chairman jongka Meghalaya State Planning Board (MSPB), u la ong ki don bun ki lad ban pynjanai ïa ka jingtreikam khnang ban pynneh ïa ka shongsuk shongsaiñ ha ka jylla.
U la pynpaw ruh ïa ka jingsngewkhia halor ka jingkiew rasong ki kam tuh kam thiem ha kiba bun ki shnong ha ka jylla. “Kine ki dei ki jingjia ba sngewsih hynrei kiba ktah pat ïa ki paidbah,” u la ong.
Shuh shuh u Bah Metbah u la dawa ïa ka tnat Pulit ba kan pynshitom mardor ïa ki nongïalam jong ka Legal Rights Observatory (LRO) kaba pyrshang ban pynpaw dak sniew ïa ka jylla Meghalaya.
“Lada ki pyni ïa ka dur ba ki paidbah ka Jylla Meghalaya ki dei kiba isih jaitbynriew, nga tharai ngin ym lah ban shu sngap bad ym dei hi ruh ban ailad…Ka Sorkar ka dei ban shimkhia bha ïa kum kine ki khubor bad dei ban kem bad ban pynshitom noh mardor khlem da pynslem,” u la ong.