Yn treikam borbah ka vote sngew synei ïa u kyrtong ka UDP ha Sohïong: Titos

0

Shillong, Lber 13 : U Working President jong ka United Democratic Party (UDP), Bah Titos W Chyne u la ong ba khlem artatien ka vote sngewsynei kan treikam bha na ka bynta u kyrtong ka UDP ha Sohïong hadien ka jingkhlad kyndit noh u kyrtong, Bah HDR Lyngdoh.
Haba kren bad ki lad pathai khubor, u Bah Titos u la ong, “La kumno kumno ha kine ki khyndiat sngi ka party kan sa leit ban pynbna noh ïa ka kyrteng jong u pyrsa jong u Bah HDR hi, u Bah Synsharlang Thabah ha ka jingïalang kaban long ha Sohïong.”
Kumban shu kdew hangne, hadien ba ka jingkhladnoh jong u Bah HDR Lyngdoh, na ka liang ka Election Commission ka la buhteng shwa ïa ka elekshon jied MLA ha Sohïong.
Ha kajuh ka por, na ka liang ka UDP Sohïong ruh hadien kane da kawei ka sur ka la tyrwa beit da ka kyrteng jong u Bah Synshar Thabah ban ïakhun ïa katei ka elekshon MLA. “Na ka liang ka State bad District ruh ngi shaniah beit bad burom ïa ka jingtyrwa jong ka Circle,” bynrap biang u Bah Titos ba dei ruh u CEM ka KHADC ha kajuh ka por.
Na ka liang utei u heh UDP haba jubab halor ka jingkylli, u la ong ba um lah satia ban ong la ka jingtreilang ka UDP ha ka sorkar kan ktah neem ïa ka elekshon ha Sohïong. “Ngi la ïohi ïa ka jingieid jong ki paidbah Sohïong ia u Bah HDR Lyngdoh ba baroh ki khot u Maheh, kumta ngi khmih lynti ruh ba kane ka elekshon ki paidbah kin pynjop donburom ïa u kyrtong ka party ba dei ruh u pyrsa jong u.”
Kumba ka long hi, ki la don bun ngut bha ki kyrtong kiban aireng ha kane ka elekshon,kata kynthup ïa u MLA Bah Samlin Malngiang na ka NPP, nangta u kyrtong ka Congress, kyrtong ka TMC, kyrtong ka HSDP bad ruh na ka BJP.

Leave A Reply

Your email address will not be published.