Shillong, Lber 14: U Bah Ardent Miller Basaïawmoit, President ka VPP, u la pynpaw ka jingkmen ïa ka jingangnud ki paidbah ban kyrshan ïa ka Seng bad kumjuh ruh kiba kwah ban mih shakhmat ban ïa ka elekshon MDC na ka VPP. Hynrei kane ka la pynktha khlieh pat ïa ki nongïalam ka Party ha kaba ai ticket ban ïakhun MDC.
Haba kren ha ka jingïalang ha Smit ha ka jingleit jong u sha ki Shnong ki thaw ban leit ai khublei ïa ki paidbah, u Bah Ardent u la ong ba namar ka jingbun palat kiba kwah ban ïakhun MDC na ka VPP, ka Party ka lah ban shu pynïakhalai nusip ha ki Constitituency kiba don ki briew kiba mar ïabiang bor.
“Ngin nym leh shiliang khmat ïano ïano ruh, hynrei imat ngin hap shu pynkhalai nusip noh mano ban ïoh ticket ban ïakhun MDC”, la ong u Bah Ardent.
U la ïathuh ruh ba kiba bun ki paidbah na kylleng kylleng wat na ki jaka bym don ka Seng VPP ruh ki la phone sha u ban seng noh ïa ka VPP ha ki Constituency jong ki.
“Ka jingangnud ki paidbah ban ïoh ïa u Prah ka la long kumba kwah sohjew ki kynthei kiba armet”, la ong u Bah Ardent.
Shuh ha kane ka jingïalang u Bah Ardent u la kren bynñiaw ïa ka jingbym ïoh lad ban thaw sorkar da ki Seng Riewlum, namar ba ki don kiba shet kylla noh tang shiteng por. “Ki paidbah ki la kwah shisha ïa ka jingkylla bad kwah ba ki Seng Riewlum kin synshar ïa ka jylla, hynrei namar ki katto katne, kane ka jingthmu ka la pulom noh”, u la ong.
U la ïathuh ruh ba ka VPP ha la buh ïa ki kyndon ban ïatreilang kumba ka la leit ïalap kylleng kylleng ha ka por elekshon ba kan ïatreilang ban thaw sorkar tang lada biang ki kyndon. Hynrei wat la katta ruh tang ban ïoh ban thaw sorkar ki Seng Riewlum ka VPP ka la pynsynjor ïa ki kyndon bad tyrwa ruh ban shu kyrshan nabar tang ban ïoh thaw sorkar ki Seng Riewlum, hynrei kane ruh kam shym la urlong.
U nongïalam ka VPP u la ong ruh ba na ka liang ka Seng hi ka la kren shai ba da lei lei kan nym lah ban ïatreilang bad ka NPP namar ka jingsynshar donbor bad ka jinglehsat kane ka Party ïa ki paidbah ha kine ki san snem baladep.
Haba pynpaw ba haba ki MLA ka VPP kin shong beit badtrei ïa ka kam kum ki dkhot ka Liang Pyrshah, u Bah Ardent u la ïathuh ba kiba bun ki longkmie, ki longkpa, ki la wan ai khublei ïa u bad ong ruh ba kim lei lei wat lada ym ïoh ei ei ha kine ki san snem ban wan, hynrei ki la kyntu ïa u ban ïeng beit ha ka nongrim kaba skhem kaba u la ju ïeng baroh shi katta.
Haba ai khublei ïa ki palat khatlai hajar ngut ki nongkyrshan kiba la pynjop ïa u, u Bah Ardent u la ong ba mynta u la dei u MLA jong barohy ki paidbah ka Nongkrem Constituency bad kino kino kiba donkam ki lah ban wan beit sha u bad ym da donkam ban ïaid lyngba jongno jongno.
Ha Smit, ki paidbah nongshongshnong, ki la pdiang sngewbha ïa u Bah Ardent da kaba tem da ka ksing ka dhah bad ïaid paidbah naduh ïew Smit sha madan ba ju pynlong ki jingïalang kaba don hajan ka Madan shad Nongkrem. Ha ka jingïalang ba la pynîaid da u Sordar, u Bah Pynshongdor Lyngdoh Nongbri, ki paidbah ki la pynkup burom da kaba pynkup da ka jaiñ ryndia bad kumjuh ruh ka jingai syntiew bad ka jingrwai na ki samla jong ka Shnong.
