Shillong, Lber 14 : Ka Myntri ka tnad ka Koit ka Khiah, Dr. M Ampareen Lyngdoh ka la lum ïa baroh ki ophisar jong ka tnad ban buddien ïa ki kam jong ka tnad bad ruh na ka bynta ban ïoh pynjanai shuh shuh ïa ka jingshakri ha ka koit ka khiah jong ki nongshong shnong.
Ha katei ka jingïalang, ki ophisar jong ka tnad ki la pyntip ruh ïa ka Myntri haba ïadei bad ka jingïaid beit jong ki prokram bapher bapher jong ka tnad ha kine ki snem kynthup naduh ka jingpynrung lang ha ka MHIS ïa ka Outpatient Department, ka jingpyntreikam ïa ka Meghalaya Health Systems Strengthening Project, MeghalayanMedical Drugs and services, MeghalayaMedical Services Recruitment Board, Rescue Mission, bad ruh ka jingpyntreikam ïa ki kor ki bor ha ka jingtreikam ha ka tnad.
Na ka liang u P Sampath Kumar, Principal Secretary u la pyntip ruh ïa ka Myntri ba ka tnad ka la treikam ha ki lai nongrim ban ai ka jingshakri ha ka koit ka khiah katkum ka Meghalaya Health Policy, 2021. U ong ruh ba ka tnad ka khmih lynti ruh ban lah ban pynjlan ïa ka rta jong ki briew, ban pynshlur ïa ki paidbah ban sumar ïalade, bad ruh ban ïada lypa bad pynduna ïa ka jingpynlut, ban pynduna ïa ka jingïap khlem dei por bad kiwei kiwei.
Ki ophisar ki pyntip ruh ïa ka Myntri halor kiba bun ki jingeh kiba ki kynduh, kum ka jingduna ki nongtrei kiba la tbit, ban pynpoi ïa ki jingsumar kaba paka sha ki jaka ba shem jingeh ban poi, bad ruh ka jingkhia ban ïakhun ïa ki jingpang ki bym ïabit pateng hynrei na ka rukom im (non – communicable diseases), kum ka jingdih sikret, ki jingdih ba sniew bad kiwei kiwei.
Haba kren hadien ka jingïalang, ka Myntri ka la pynpaw ïa ka jingkmen halor ka jingtrei borbah jong ka tnad na ka bynta ban pynbiang bad kyntiew ïa ka koit ka khiah jong ki nongshong shnong. Da kaba kular ba ka sorkar kan kyrshan borbah ïa ki heh sorkar ha ka jingtreikam, ka Myntri ka la pynshlur ruh ïa ki ban shim ïa ka jingai jingmut na ki nongmihkhmat paidbah kum ki MLA jong kito ki jaka bad ruh ban pynleit jingmut ha ka bha ka miat jong ki nongtrei ka koit ka khiah.
Ha kane ka sngi ki heh sorkar kiba la donlang ki kynthup naduh u P Sampath Kumar, Principal Secretary, Kong RM Kurbah, Secretary, Ramkumar S, Secretary, Twinkle Marak, Deputy Secretary, Dr. HC Lyndem, Director,DHS(MI), Dr. Y Phira, Director (Research), Dr. S.S.Nongbri, Director (MCH& FW) nalor kiwei kiwei.
