Kubur u Bah Sniawbhalang Dhar ba long mawjynthut ka VPP ïa ka NPP ha ka elekshon

Shillong, Lber, 14: U nongïalam ka National Poeple’s Party (NPP) u Bah Sniawbhalang Dhar uba long ruh u Symbud Myntri Rangbah ka Jylla ha ka sngi Baar u la kubur ba ka jingmih jong ka Voice of the People Party (VPP) ka la long kum u mawjynthud ïa ki kyrtong ka NPP ha ka elekshon kaba dang shu kut shen ha ka Jylla.
Ki Constituency kiba ki kyrtong jong ka NPP ki la shah rem hakhmat ki kyrtong ka VPP ki long ha Nongkrem, ha Mawlai, ha Mawryngkneng bad ha North Shillong Constituency.
Ha kaba ïadei bad ka jingjop duna eh jong ka All India Trinamool Congress (AITC) bad ka Bharatiya Janata Party (BJP) une u nongïalam jong ka NPP u la ong ba kine ki ar tylli ki party ki dei kiba ki paidbah jong ka Jylla Meghalaya kim pat lah satia ban pdiang.
“Lada ka party ka dang jop tang 2-3 Seat ka pynpaw shai kdar ba ki dei ki seng saiñpyrthei ki bym pat lah satia ban pdiang da ki paidbah ha ka jylla,” la ong u Bah Dhar ha ka jingïakren bad ki lad pathai khubor.
Ha kajuh ka por, u Bah Dhar u la ïathuh ba ka NPP kan sa tih bniah (post-mortem) ha kaba ïadei bad jingshah pynjem khnap ha rilum Khasi ha ka elekshon ba dang shu kut shen.
“Ngin sa pynlong ïa ka post-mortem halor kane tang shu kut ka Dorbar Mang Tyngka jong ka iingdorbar thawaiñ,” ong u Bah Dhar.
Ka National People’s Party (NPP) ka la lah ban jop tang 8 Seat na rilum Khasi bad Jaiñtia. Na kine, ar Seat ki dei na East Khasi Hills district.
“Ka result ha Jaiñtia Hills ka biang namarba ngi kheiñ antad ban ïoh hapdeng 4-6 Seat. Kumjuh ruh, ha Ri Bhoi, ngi la kheiñ antad ban ïoh 1-3 Seat hynrei ka duna pynban na kaba la khmihlynti ha rilum Khasi,” u la ong.
Haba kylli hato ka don neem ka jingpyrshah kaba jur ïa ka NPP ha rilum Khasi, u Bah Dhar u la ong, “ka long kaba eh (ban ong) namarba ngim pat tip ïa ka daw tynrai balei ngi duh bun bha ki Seat ha rilum Khasi. Namarkata, ngin sa pynlong ïa ka postmortem tang shu kut ka dorbar mang tyngka khnang ba ngin dup lah ban pynjanai shuh shuh ha ka elekshon ka ban sa long.”
Une u Symbud Myntri Rangbah ula kyntait ruh ban ïa mynjur ba ki paidbah ka rilum Khasi kim pat lah ban pdiang ïa ka NPP da kaba ong, “ki don bun ki daw. Phi tip hi ha rilum Khasi ki don buh ki party kum ka UDP, PDF, BJP, NPP, VPP. Hynrei kam mut pat ba ki paidbah kim pat pdiang ïa ka (NPP). Ban jop haduh 26 Seat ha ka jylla baroh kawei kam dei satia kaba kai.”
Da kaba kynthoh halor ka jingdawa ba dang shen ban sei Myntri Rangbah na rilum Khasi-Jaiñtia, u Bah Dhar u la ong, “ban dawa Myntri Rangbah da u Khasi nga sngew ba ka long kaba bakla bad ngi hap ban burom ïa ka rai jong u paidbah.”
U la ong, lada ki paidbah ki kwah ban ïoh Myntri Rangbah na rilum Khasi-Jaiñtia, ki dei ban pynjop tang ïa kawei ka party na kane ka thaiñ.
“Ai ba kin pynjop tang ïa kawei ka party na rilum Khasi. Kata kaba biang palat. Ki lah ban pynjop ïa ka UDP, ïa ka NPP lada ki kwa hynrei kumba ka long ki pynjop bun tylli ki party. Hato ngin lah ban ong aiu ma ngi,” u la ong.