Mynta yn ïathir ka tnat Pynroi Sor ban pynkynriah ïa ki 342 ïing na Them Ïewmawlong

Shillong, Lber, 14: U Symbud Myntri Rangbah uba peit ïa ka tnat Pynroi Sor u Bah Sniawbhalang Dhar un sa lum ïa ka jingïalang ban ïathir sani halor ki projek kiba dang pyntreikam hapoh ka Sor Shillong bad nalor kata kane ka tnat kan sa ïathir ïatai ruh ha kaba ïadei bad ka jingpynkynriah ïa ki 342 tylli ki longing na Sweepers’ Colony, Them Ïew Mawlong ha ka jingïalang ka ban sa long ha ka sngi Balang mynta ka taïew.
“Ngan sa bishar bniah lashai ka sngi ïa baroh ki projek kiba dang pyntreikam ba kynthup ruh ïa ki Smart City projek,” ong u Bah Dhar ha ka jingïakren bad ki lad pathai khubor.
U la ong, katto katne ki projek ki kynthup ïa ka jingshna ïa ka Ïew Shyllong ha Laitumkhrah, ka ïew Polo, ka surok na ka smat city projek bad kiwei kiwei. “Ngan sa tip ïa ka jingïaid shakhmat ka kam bad ka jingpynlut ïa ka pisa ha kaba pyntreikam ïa kine ki projek tang shu la lum ïa ka jingïalang,” la bynrap u Bah Dhar.
Haba pynpaw ba ki projek bapher bapher ki dei kiba la don la ki jong ki por ba la buh ban pyndep, u Symbud Myntri Rangbah u la ong, “ngan sa pyrshang ban leh ïa kaba bha tam ha kine ki sngi ki ban sa wan ban pyndep ïa ki projek ha ka por ba la buh.”
Shuh shuh u la bynrap ba ka Jylla kam don jingeh eiei ha kaba ïadei bad ka jingmang pisa bad ka pisa ka wan beit sak sak na ka Sorkar India sha ka Sorkar Jylla.
U Bah Dhar u la pyntip ba un sa khot ruh ïa ka jingïalang ban ïakren ha kaba ïadei bad ka jingpynkynriah ïa ki briew kiba sah ha Sweepers’ Colony na Them Ïew Mawlong.
“Ngan sa khot ïa ka jingïalang ha ka kyrdan jong nga kum u Myntri ka tnat Pynroi Sor. Hadien kata, u Chairman jong ka High Level Committee un sa khot ïa ka jingïalang bad yn sa shim ruh ïa ka rai (ha kaba ïadei bad kane,” u la ong bad bynrap, “lashai, ka jingïalang kan sa long katkum ka kyrdan jong nga bad hadien kata ngin sa shong ïa ka jingïalang jong ka Jylla. Ngin sa hap ban khot ïa ki (Harijan Panchayat Committee). Ka Ingbishar ka ladep bthah bad ngin sa peit…..hynrei ngi kwah ban pyndep noh ïa kane ka kam kham kloi.”
Shuh shuh, u Bah Dhar u la pyntip ha ka jingpynbhabriew ïa ka Sor Jowai ka dang ïaid shakhmat bad 90 percent na ki surok hapoh ka Sor ki dei kiba ladep. Katkum ka kaiphod, ïa ka surok yn sa shna pyndep ha ki 10 sngi ki ban sa wan.
Ha kaba ïadei bad tnat Home (Jail), u Bah Dhar, u la ong ba ym pat ïohlad satia ban ïa kynduh ïa ki ophisar jong kane ka tnat. U la ong, dang shen, ka Sorkar ka ladep thmu ban shna ïa ka Central Jail hynrei ïa ka jinglong jingman ba ladep tyrwa yn sa tip tad ynda la shong ïa ka jingïalang ka ban sa long la shi sngi.