Shah thang ka tyngshop u CM ka Assam ha Khliehriat, kyntu shimkhia ïa ki Minister Jaiñtia

Khliehriat Lber 14 : Ki dkhot jong ka East Jaiñtia National Council, kaba hapoh ka jingïalam u President, u Bah Sambormi Lyngdoh bad u General Secretary, u Bah Nangjan Dkhar, mynta ka sngi ki la ïa mih puk ha sor bah Khliehriat bad ki la thang ïa ka tyngsop jong u Myntri Rangbah ka jylla Assam, u Himanta Biswas Sharma, uba la kam ba ka shnong Mukroh ka dang hap ha Assam.
Ki nongïalam ka EJNC, ki la ïathuh ba kane ka jingthang ïa ka tyngshop ka long ban pynpaw ïa ka jingsngew pyrshah bad pynrem jur ïa ka jingkam pud ka Assam kaba khlem nongrim bad kaba ym lah satia ban pdiang.
Haba kren ha ka jingïalang, ha shwa ban thang ïa ka tyngshop, u Bah Sambormi Lyngdoh u la pynpaw ka jingsngew bitar halor ka jingwan kam pud u Myntri Rangbah ka Assam, uba la pynpaw hakhmat ka iïngdorbar thaw aiñ jong ka Assam, da kaba ong ba ka shnong Mukroh ka dang hap hapoh u pud u sam jong ka Assam.
“Ngi kum ka East Jaiñtia National Council, ngi la pynkhreh ban thang ïa kane ka tyngshop jong u Myntri Rangbah ka Assam, naduh hynnin ka sngi, hadien ba ngi la ïohi lyngba ki pathai khubor ba utei u Myntri Rangbah u la kam ba ka shnong Mukroh ka dang hap hapoh u pud u sam jong ka Assam”, la ong u Bah Sambormi.
U la ong ba kane ka dei ka jingkren ka bym don nongrim. Kane ka jingmih shakhmat jongka seng, ka long ban pynpaw ïa ka jingpyrshah ïa katei ka jingkam pud bad ka jingkren khlem pyrkhat u Himanta. U la ong ba baroh ki tip ba ka shnong Mukroh ka dang hap hapoh u pud u sam jong ka Meghalaya, namar dang myn ha kane ka election ba la dep ruh, ki nongshong shnong ki dang thep vote sha Meghalaya bad wat ki skim pynroi ruh ki dang wan na ka sorkar Meghalaya.
Shuh shuh u la ong ba ka ha ka jingshisha, ka sorkar Meghalaya, ka la dei ban phah pynkynriah noh ïa ka Forest Outpost jong ka Assam kaba don ha katei ka shnong Mukroh, namar kato ka jaka ruh ka dang hap hapoh ka Meghalaya. “Ngi phah ïa kane ka khubor kaba shai sha u Myntri Rangbah ka Assam, ban sangeh noh ban mutdur bad ban phohsniew , ban sangeh noh ïa ia ka jingkren biej, ban ong ba ka shnong Mukroh ka dang hap hapoh West Karbi Anglong, Assam, namar katkum ki kot ki sla kiba don ha ki bor shnong bad ha Jaiñtia Hills Autonomous District Council, ki la pyntikna ba ka shnong Mukroh ka dang hap ha Meghalaya, ha West Jaiñtia Hills District”, u la ong.
Utei u nongïalam ba rangbah ka EJNC, u la pynkynmaw ruh ïa kato ka por ba shah siat iap ki nongshnong shnong ha Mukroh ba la siat da ki pulit Assam, u la ong ba hadien katei ka jingshah siat iap ha ki pulit Assam, ha Mukroh bad ka jingkam u CEM jong ka Karbi Anglong District Council, uba la ong ba ki nongshong shnong jong ka Mukrok, ki dei kita ki nongshong shnong beaiñ, kane ka la pynbitar ïa ki dkhot ka seng, ha kaba mar mar ruh ki la leit sha shnong Mukroh bad kumjuh ruh na ka liang ka seng ha kato ka por, ki la leit ïakynduh ruh ïa u CEM jong ka Jaiñtia Hills Autonomous District Council bad ki la pan ïa ka jingpynshai halor kane, hadien kane, na ka liang ka District Council, hapoh ka jingïalam u CEM ka JHADC, ki la leit hiar sha shnong Mukroh ban jurip bad ki la pynshisha ba ka shnong Mukroh hi ka dang hap hapoh Meghalaya, ha West Jaiñtia Hills District.
“Hynrei hynnin pat ngi la ïohi ïa ka jingkam u Myntri rangbah ka Assam kaba la pynsngew lyngngoh bad sngewdiaw ïa ngi, namar, dang ha ki snem ba la leit, ha ka jingïa pynbeit pud ka sorkar Meghalaya bad ka sorkar Assam, ha ka Phase 1, bun ki jaka jong ka Meghalaya kiba ngi la duh ei noh”
Na ka liang ka seng, ki la phai khmat ruh sha ki nongmihkhmat kiba na ri lum Jaiñtia, kiba kynthup u Deputy CM, u Bah Sniawbhalang Dhar, kumjuh ruh u Bah Comingone Ymbon bad u Bah Kyrmen Shylla, kiba dei ki myntri ka sorkar jylla ba kin shimkhia ïa kane ka kam, ban ïakren ha ïingdorbar thaw aiñ, ban shim khia ruh ban ïada ïa ka khyndew ka shyiap jong ka ri lum Jaiñtia. Ka Seng ka kyrmen ba lyngba ka jingshimkhia jong ki, ka jingpynbeit ïa u pud u hapdeng ka sorkar Meghalaya bad ka sorkar Assam, ha ka phase II, ka Mukroh ka dei ban hap hapoh ka jylla Meghalaya.
Ha kajuh ka por, ka Seng, ka kyntu jur ruh ïa ka sorkar MDA 2.0 da kaba ong ruh ba kum ki Sengbhalang, kiba dang don ka jingsngewkhia ïa u pud u sam, bad sheptieng ruh ïoh duh ei pynban ïa ka shnong Mukroh.
Ka Seng ka la kular ruh ban ïai buddien ïa kane ka kam bad ban ïai don ryngkat ruh bad u paidbah lada ka Assam ka wan thom da ka bor.