Nongstoiñ, Lber 15 : Ka kynhun ïalehkai jong ka Lamare SC Shillong, ka la khur ïa ka nam lahduh ha ka lympung ïalehkai phutbol ba la tip kum ka Invitation Knock Out Football Tournament 2022-23, ba la pynïaid da ka New Nongstoiñ Sports Social and Cultural Club ha madan New Nongstoiñ.
Kane ka nam lahduh ka la jia long ha ka sngi balang hadien ba ka la lah ban pynliem ïa ka Ri Bhoi United da shi kol la nod, ha ka final kaba la sakhi da ki paidbah bun byllien kiba la tuid ban sakhi ïa kane ka jingïalehkai final.
Haba phai sha ka jingïalehkai, la sakhi ïa ka sur ïalehkai kaba mar biang bor. Pynban khyndiat minit hadien ba ka jingïalehkai ka dang ïaid, u nongap kol ka Lamare SC u la shah beh noh na madan ha u nongpynïaid u ba la sei da ka Red Card, hadien ba u la kum pynur jubor ïa u rang ïalehkai ka Ri Bhoi, u ba don ka kabu ba biang bha ban thep kol. Hynrei, phewse wat la kane ka kabu pynban ka Ri Bhoi kam shym la ïoh ban pynurlong ïa ka shi kol, na ka daw ba u nongap kol ba ar u la lah ban kyrda na ka jingshah thep.
Hadien kane ka red card, ka sur ka dur ïalehkai ka la kylla syndet ha kaba ka Ri Bhoi kaba dang don ha ka ïa ki 11 ngut ki rang ïalehkai, ka la sdang ban teh lakam ïa ka jingïalehkai bad ka la ïoh ruh bun bha ki kabu khamtam ha ka kylla miet. Hynrei, baroh ki kabu ki lehnohei lut bad watla bun bun sien ka la pyrshang ban khyrwit na kham pajih ka dieng kol, pynban bunsien ka bol ka kiew beit ïa ka cross bar.
Hapdeng ka jingïakhun kaba la kham noh shilliang bad ba la poi ruh sha ka jingpynjlan por kata hadien ka 90+ minit, ka Lamare SC kaba don ha ka ïa ka bok ka nusip, ka la ïoh ban thep ïa ka kol kaba itynnad na u Nelson Rymbai, ïa kaba la pynbuh bha ruh da u Donlad Diengdoh.
Da kane ka shi kol, ka Lamare SC ka la khur syndon ïa ka nam lahduh bad ruh ïa ka song tyngka ba T.7 lak tyngka. Katba ka Ri Bhoi United FC watla kaba la ïakhun tyngeh hynrei ka hap ban shu hun noh ha ka nam rem bad ïoh pdiang ïa ka song tyngka ba T 3 lak tyngka na ki nongpynïaid.
Ha kane ka jingïalehkai na ka liang ka NNSSCC, ka la jied ruh ïa u rang ïalehkai ka Lamare SC kata u Donlad Diengdoh ban rah ïa ka khusnam kum u rang ïalehkai ba kynsai jong ka jingïalehkai final.
Kumjuh ruh la pynphuh pynphieng bad pynshongshit ïa kane ka sngi da ki prokram bapher bapher kynthup ïa ki jingpynkhalai nusip sha ki paidbah ba wan peit kai. Katba na ka liang u Bah Gabriel Wahlang MLA ba dang shu jop na Nongstoiñ Constituency, u la long u kongsan ban sam ïa ki khusnam sha ki ar kynhun kiba la poi Final.
Haba kren ha ka jingïalang shwa ban khylliap lama noh ïa kane ka lympung, na ka liang u Kongsan u la khot la wer sha baroh ban ïatreilang ha ki bynta baroh, khnang ban kyntiew ïa ki kam ïalehkai ba bun jait ha ka dong ka thaiñ. U la kitbok bad ai mynsiem ruh ïa ka NNSSCC ba kan nang pyntyllun ïa ki kam bad ban ïai bteng ban pynlong ki lympung jingïalehkai, khnang ban sei ïa ki sap ki phong jong ki samla kynthei bad shynrang jong ka thaiñ.
