Yn tam ka NPP na kaba ïoh mynshwa ruh, kam u Conrad bad Bah Prestone

0

Shillong, Rymphang 27 : U National President ka NPP, Conrad K Sangma ba dei ruh u Myntri Rangbah kumjuh u National Vice President, Bah Prestone Tynsong ba dei ruh u Symbud Myntri Rangbah ki la kob ba ka NPP kan tam wat ïa kaei kaba ki ïoh ha u 2018 ruh.
Lah ban kdew hangne, ba ka jingjied ïa ki nongmihkhmat thymmai ka dei shwa tang ha ki 59 constituency hadien ba la hap ban pynsangeh shwa ïa ka Sohiong naka daw ka jingkhlad kyndit u kyrtong ka UDP, Bah HDR Lyngdoh.
“Ngi dap da ka jingkmen kaba khraw ban ïohi ïa kane ka lyer bad kumta ngi kyrmen ba ngin lah ban jop kham bun mynta kakynti ban ïa kaba ngi ïoh ha ka samoi ba la dep ruh,” ong u Conrad haba kren bad ki lad pathai khubor da kaba kob lypa shwa ban pynbna ïa ka result kaba la buh ban pynbna ha ka 02tarik Lber.
Shuh shuh u la ïathuh ruh ba katei ka jingantad lypa katno tylli ki constituency ba kin jop la ju leh shwa san ne hynriew sngi shwa ban thep vote.
“Kumta, ha kine ki san bad hynriew sngi,ngi la ïohi ba ka la ïaid shakhmat bad ngi khmih lynti ba ka jingdon kiba jop kan tam wat ïa kaba rim,” u la bynrap biang.
Haba kren pat bad ka jingpynkhreh ban thaw ïa ka sorkar, utei u heh ka NPP u la ong ba ka nongrim jong ki kadei kaba shai ba kin trei na ka bynta ka bit ka biang jong ka jylla bad dei na kata ka daw ki kwah ban ïoh ïa ka sorkar kaba skhem. Hynrei haba ïadei pat bad katei ka jingthaw ïa ka sorkar u la ong ba kin sa shim ïa ka rai ynda la poi ka por.
Nalorkata, um pat treh ruh ban kren ei ei la bad no kin thaw ïa ka sorkar hynrei u la shu ong ba kin peit shwa tad haduh ban da dep shwa ka jingñiew vote.

Leave A Reply

Your email address will not be published.