Shillong, Rymphang 27: U Chief Electoral Officer (CEO) ka jylla u bah F.R Khanrkongor ula ïathuh ba ka jingthep Vote ha ki 6 tylli ki Polling Station jong ka Block-II, kiba hap hapoh ka Mawhati konstitwensi Ri-bhoi District ki ïaid beit ïaid ryntih namar ka jingïatreilang hapdeng ka sorkar Meghalaya bad Assam.
U bah Kharkongor ula ïathuh ba naka liang ka tnat Election Commission of India (ECI) kala shim khia hadien bala ïoh khubor ba uwei u MLA napoh ka jylla Assam uba la byrngem ban pyndik ïaki nong Meghalaya kiba sah ha ki thaiñ khappud lada ki mut leit thep Vote.
“Naka liang ka ophis CEO bad ka sorkar Meghalaya kila shim khia bad na ka liang ka Chief Election Commissioner (CEC) ruh haka 13 tarik mynta u bnai kala kular ba baroh kiba don kyrteng ban thep Vote ha ki 6 tylli ki Polling Station kiba hap ha Mawhati konstitwensi ki dei ban ïoh ïaka hok ban thep Vote” la ong u bah Kharkongor.
U bah Kharkongor ula ïathuh ba naka liang u chief secretary (CS) ka Meghalaya ula ïakren bad u CS ka Assam bad naka liang ki bor district naduh ki Deputy Commissioner (DC) bad ki Director General of Police (DGP) jong baroh artylli ki jylla kila ïatreilang ban pynthikna ba ki nongthep Vote kiba don palat 2000 ngut ki ïoh ka hok ban leit thep Vote.
“Haduh mynta kam shym la don kano kano ka jingshah pyndik ïaki nongthep Vote ha ki 6 tylli ki Polling Station kiba hap ha Mawhati konstitwensi bad naka liang ka tnat pynïaid ilekshon ka ai khublei ïaka sorkar Assam kaba la ïatreilang naka bynta ban wanrah ka jingshngaiñ ïaki nongthep Vote kiba don ha ki thaiñ khappud Meghalaya-Assam” la ong u bah Kharkongor.
