Shillong, Rymphang 27: U Chief Electoral Officer (CEO) ka jylla u bah F.R Kharkongor ula ïathuh ba ka tnat pynïaid ilekshon kala ïoh pdiang ka jingujor naka ka kyrtong jong ka KAM Meghalaya kaba la kynnoh ba ka la don ka jingsam pisa ha South Shillong constituency.
Haba kren sha ki lad pathai khubor u bah Kharkongor ula ïathuh ba hadien ka jingïoh pdiang ïaka jingujor, naka liang u District Election Officer (DEO) ula phah ïaka kynhun Flying Squad ban leit tohkit.
“Hadien ba ka kynhun Flying Squad ka poi sha kato ka jaka kumba la ujor daka kyrtong jong ka KAM Meghalaya ryngkat bad ka jingkynnoh ba la don ka jingsam pisa, ka kynhun Flying Squad kam shym la lap eiei hynrei naka liang ka tnat pynïaid ilekshon kala shim khia halor kane ka jingujor” la ong u bah Kharkongor.
U bah Kharkongor ula ïathuh ruh ba ka tnat pynïaid ilekshon kala ïoh jingujor na kiwei ki jaka kum na Tikrikilla konstitwensi kaba hap ha West Garo Hills bad naka liang u District Election Officer (DEO) ruh ula leh ïaka ba donkam ban phah tohkit haka kynhun Flying Squad hynrei ka kynhun kam shym lap eiei.
Ula ong ba kane ka jingbym lap eiei ka kynhun Flying Squad haba ki leit tohkit ka lah ban dei ruh ba ki Video bala ring bala kam ruh ba ka don ka jingsam pisa ka lah ban dei ba la ring ïa kine ki Video ha kawei por bad haka por ba ka kynhun Flying Squad ka poi ha kato ka jaka kim shym la lap eiei shuh.
