Ïaid beit ka jingthep vote ha ki 5 tylli ki Constituency ha Ri Bhoi, poi kumba 73.18% ki nongthep vote ha Ri Bhoi

0

Nongpoh, Rymphang 27: Mynta ka sngi hadien ba la sdang ka jingthep vote la sakhi ba ki paidbah ki la mih ban poi sha ki Polling Station ban ap ïa la ka pali na ka bynta ban ioh ïa ka hok ban thep vote ka hok ban jied ïa la ki nongmihkhmat ban mihkhmat sha ka ïing dorbar thawaiñ ka jylla.
Ha Ri Bhoi District ka jingthep vote ka la ïaid beit ïaid ryntih ha kaba ki paidbah ha kylleng ki Polling Station ki la leit ban ap ïa la ka pala ban ioh thep vote bad kumba long haduh ba la thoh ïa kane ka khubor ki dang bun kiba ym pat ioh ïa ka pali ban thep vote bad ki dang ap khmih lynti ban ioh la ka pali na ka bynta ban ioh ïa la ka hok thep vote.
Ka jingthep vote ha ki Polling Station ka la sdang naduh ka por 7 baje mynstep bad tang mar ïa sdang ki paidbah nongthep vote ki la ieng laiñ ban ioh ïa kata ka pali ban leit thep ïa la ka vote.
Kumba long haduh mynta ka jingthep vote lane ka jingjied ïa kita ki nongmihkhmat ka la ïaid beit ïaid ryntih wat la ki don haduh 95 ki Polling Station ba don jingma bad 54 kiba kham don jingma kumba la pynpaw da ki bor pynïaid election ha Ri Bhoi.
La sakhi ruh ha kane ka sngi, ki paidbah ki don ïa kata ka jingangnud ban leit thep vote ha kaba bun na ki dukan ki la khang khyrdep bad ki jaka paidbah ki la kynjah, namar ba bun ki paidbah ki la ïa tuid sha ki Polling Station na ka bynta ban leit thep vote.
Kumba la ioh lum jingtip haduh ka por 5 baje janmiet ka jingwan poi ki nongthep vote ka la kot sha ka 73.18 percent bad lah ban dang kiew ki nongthep vote ha kaba ka jingthep vote ka dang ïaid shaphrang ha jan baroh ki Polling Station kiba don ha Ri Bhoi.
Haba khein katkum ka jingwan poi ki nongthep vote ha ki san tylli ki constituency ha Jirang ki poi 75.25%, Mawhati 70.02%, Nongpoh 76.44%, Umroi 75.12%, bad Umsning 69.37%.
Lyngba jong kane ka sngi, la ioh ruh ban ïa kren bad ki katto katne ki kyrtong ba kynthup u kyrtong ka UDP na Nongpoh, u Bah Mayral Born Syiem, u kyrtong ka NPP na Jirang, u Bah Sosthenes Sohtun, u kyrtong ka NPP na Umsning, u Bah Jason Mawlong, u kyrtong ka TMC na Umroi, u Bah George B. Lyngdoh, ka kyrtong ka BJP na Nongpoh, ka kong Marian Maring bad u kyrtong ka HSPD na Umsning, kine ki kyrtong wat la ïa ka rai ki paidbah ym pat lah ban ai jingkheiñ, hynrei ki la pynpaw ïa kata ka jingkyrmen ba kin poi sha ka thong bad ka rai kaba khatduh hi ka long ha ka 2 tarik Lber 2023 mano ban shah jied napdeng baroh ki kyrtong ha ki san tylli ki constituency ha Ri Bhoi.

Leave A Reply

Your email address will not be published.