Shillong, Rymphang 27 : U Chief Electoral Officer ka Meghalaya, u Bah FR Kharkongor ha ka sngi Nyngkong u la ïathuh ba mar ïa sdang ban pynbna ïa ka tarik elekshon ha ka jylla, mardor ki la sdang ïa ka jingkhynra naphang ha baroh kawei ka jylla.
Haba kren bad ki lad pathai khubor, u CEO u laïathuh ruh ba utei u drok ba ki ïoh kurup u la kot haduh 33.25 klur tyngka tad haduh ka 26tarik mynta u bnai, kaba pynlong ïa ka jylla ban ïoh kurup haduh 74.18 klur tyngka nalor ka pisa bad kiwei kiwei ki mar.
Katkum ka jingong jong u, katei ka jingseisoh ka jingkhynra kadei ruh da ka jingtrei borbah jong ki tnad ka sorkar ban ïakhun pyrshah ïa ka jingkynrei u drok ha ka jylla.
“Kane ka jingïoh kurup ka la dei haduh 20 shah ban ïa kaei kaba ngi ïoh kurup ha ki snem ba la dep,” bynrap shuh shuh u CEO.
Katkum ka jingong jong u, ha u 2018 ka tnad ka la ïoh ban kurup tang kumba 1.15 klur tyngka.
U CEO u la ong ruh ba na ka 74.18 klur tyngka, tang ka pisa ba ïoh kurup ka long 8.71 klur tyngka, ka kyiad 2.26 klur tyngkat katba ki mar remdor kum ka ksiar ki poi 91lak tyngka, ki tiar sam paidbah ba kot 28.69 klur tyngka na baroh ki kylleng jong ka jylla.
