Shillong,Rymphang 27: Kawei ka longkmie kaba la tip kyrteng kum ka Kong Rejoice Indalin Rynjah, kala pynpaw ïaka jingbitar ba ha ka por ba ka leit ban thep vote namar ka la lap ba ïa ka hok jong ka la pyndonkam bakla da kiwei pat ki briew kaba ki ong ha ka ktien nongwei ka proxy.
Kane ka longkmie kala lap ïa kane hadien ba kala leit sha ka jaka thep vote ha Lawjynriew, Nongthymmai ban shem ba ïa ka vote jong ka, la don ba pyndep da kiwei pat ki briew.
Ka kong Rejoice kala ong, ba ki bor pynïaid ïaka elekshon kim shym la shah shuh ïaka ban thep vote hynrei ka la ïeng skhem haka nongrim ba kam pat wan ban thep ïaka Vote bad hadien ba la dep ban pynkut noh ïaka jingthep vote, ki bor pynïaid elekshon kila phah ïaka Kong Rejoice ban thep noh ïaka Vote da Ballot Paper.
Halor kane ka jingjia, u Deputy Commissioner ka East Khasi Hills u SC Sadhu uba long ruh u District Election Officer (DEO) ula ong ba mar ïa ïoh jingtip halor kane ka jingjia, kila weng noh ïa ka kynhun baroh kaba la pynïaid ïa kane ka jingthep vote bad la buh noh da kiwei pat bad la ai jingbthah syndon ïa baroh ba ki dei ban da peit bniah ïa ki kot ki sla jong ki nongthep vote hashwa ba kin ïoh thep ïa ka vote ka jongki.
“Ngin phah tohkit halor katei ka jingjia ha ka Lawjynriew Polling Station bad katei ka jaka thep Vote kadei ruh ka jaka thep vote kaba leh ïaka Web Casting bad hadien ba kila dep ban bishar bniah ïaka Video, ngin sa tip shai kdar kaei kaba jia bad yn sa shim da ki sienjam kiba tyngeh katkum ki kyndon aiñ” la pynkut u DC.
Ha kaba ïadei bad ka jingkynnoh bad kawei ka nongïalam jongka seng BJP kala sam pisa ïa ki nongthep Vote ha Oakland, kaba hap ha North Shillong Constituency, u SC Sadhu ula ong, ba ula leit jurip hi dalade ïa kane ka jaka thep vote bad ula phah ïaka kynhun jong ki Pulit bad ki Flying Squad hynrei katkum ka kaiphod bad ki jingtip kiba la iïh, ka paw ba kam shym la don satia kano kano ka jingsam pisa hynrei kala don tang ka jingïalum paidbah hynrei la phah noh ïaki ba kin ïapra noh na katei ka jaka ym ban ïalum paidbah.
