Nongstoiñ, K’lyngkot 04: Ka Mawrusyiar Youth & Cultural Club (MYCC) ka la pynkhreh shait shait na ka bynta ban pynhap lama noh ïa ka jingrakhe ïa ka Jubili ksiar (Golden Jubilee) ha ka 6 tarik u Kyllalyngkot 2024 ïa ka ban pynlong ha madan shnong Mawrusyiar West Khasi Hills District.
U General Secretary ka MYCC u bah Lamborful Wanniang haba ïakren sha ki lad pathai khubor, u la ong ba ïa katei ka jingrakhe kaba la neh lah 1 snem kynthih, yn sa wan ban pynhap pyrda noh da u MP ka Shillong Seat u bah Vincent H Pala ha ryngkat ka jingiadonlang ki nongmihkhmat napoh ka thaiñ.
Shuh shuh u la ïathuh ruh ba ka prokram ha katei ka sngi kan sdang naduh ka 11:00 Am bad kin don ruh shibun ki prokram bapher bapher ban pynbyrngia. Ha ka por janmiet kan don ruh ka Concert ïa kaba yn wan rwai da ka kynhun Kids Tarari, Khmih Creative Society, Thunders Cave kiba dei ki nongrwai na ka thaiñ bad yn pynkut ruh da ka kynhun tem jong u Snow White.
Katba na ka liang jong u bah Erick Kharsyntiew Vice President ka MYCC u la ong ba ka Seng ka la pynkhreh ruh na ka bynta ka jaka ïeng kali kaba biang na ka bynta ki paidbah kiba wan sha katei ka jingrakhe.
Ka bai ticket ba ka bynta ka Concert kan long 200 tyngka na ka bynta ki paidbah bad 500 tyngka na ka bynta ki VIP bad ïa ki ticket lah ban ïoh na Common Service Center hajan ka stand taxi ban leit sha Mawlangsu.
