Nongpoh, K’lyngkot 04: Namar ka jingjyllei jong u drok ha kaba bun naki samla ha kane ka juk ba mynta kila ngop haki jingdih buaid khamtam u drok, ka Khasi Student Union Umsning Circle da ka angnud ban ai mynsiem ïaki khun samla khamtam ki heprit kiba dang khie dang san ba kin pynmlien ïalade haki kam ïalehkai bad kilan met kala sdang da ka lympung ïalehkai phutbol jong ki heprit ba hapoh 14 snem bala tip kum ka Maitshaphrang Under 14 Football Tournament ha madan Umsning Town Dorbar.
Ïa katei ka lympung ïalehkai phutbol la wan ban plie paidbah mynta ka ssngi da u Samla Ferdinald Kharkamni President ka KSU North Khasi Hills District kum u kongsan, haka jingdonlang u Bah Rocky Kylla Chairman ka Umsning Town Dorbar kum u symbud kongsan, Bah Rocky Marwein Rangbah Shnong Umsning Proper-B, Samla James Hitler Mawphñiang General Secretary ka KSU North Khasi Hills District, Samla Lester Nongbet President KSU Umsning Circle bad kiwei kiwei ki riew rangbah.
Kum ban shu pynkynmaw hangne ba ka KSU Umsning Circle dang shen kala leit ruh ban ïa kynduh ïa kiba bun ki bor pynïaid skul haka thaiñ Umsning namar ka jingdon jong ki khynnah kiba dih kyiad, biri sikret wat ha ki uniform skul bad kane kala wanrah ka jingsngewkhia ïaki nongïalam ka seng, bad dei halor katei ka nongrim kum ka jinghikai bad btin lynti ïaki heprit kiba dang khie dang san ba kin kiar naki jingmlien ba sniew ka KSU kala shim ia katei ka sienjam ban pynlong da katei ka lympung ïalehkai phutbol ryngkat ka khubor kaba shai ban kiar na u drok bad ki jingdih buaid.
Haba phai sha ka jingïalehkai plie pyrda ha katei ka sngi ka jingïalehkai ba nyngkong kala long hapdeng ka Eastern Ri-Bhoi United pyrshah ïaka Nongthymmai ha kaba ka Eastern Ri-Bhoi United kala lah ban pynliem noh ïaka Nongthymmai da 1-0 kol, katba haka jingïalehkai ba ar hapdeng ka Seng Samla Patarim pyrshah ïaka Laiphew Diengngan ka Seng Samla Patarim kala lah ban pynliem noh ïaka Laiphew Diengngan da 2-0 kol.
