Ka jingmih pyrthei jong kiba dawa ai jait kpa ka pynklumar thlim ïa ki paitbah ong u bah D.Lyngkhoi

Nongstoiñ Kyllalyngkot 04: Ka jingsaphriang sted jong ki durkhih ha ki rynsan social media halor ka phang ba ka jaitbynriew Khasi ka dei ban ai jait noh sha u kpa ka la pynklumar jingmut hi thlim ïa ki paitbah nongshong shnong ong u bah Dominik Lynkhoi uwei na ki kaitor ba paw khmat bah ha kaba rwai sur tynrai bad u nongshna ïa ki tiar put tiar tem tnrai jong u Khasi uba shong bas ah ha ka shnong Mawlangdep West Khasi Hills.
U bah Lyngkhoi haba ïakren bad u nongthohkhubor mynta ka sngi u la ong ba ha ka jing wadjingtip bniah bha jong u lyngba ki jingthoh jingtar bad ruh na ki jingïathuh khana pateng jong ki long shuwa man shuwa ka Jaitbynriew Khasi Khara naduh hyndai kulong ka dei kaba ai jait sha ka kmie.
U la ong ruh ba ha ka jinglum jingtip bniah jong u u la lap ba ha kip or ba mynshuwa ki don haduh laiphewsan tylli kl jaitbynriew ha ka pyrthei kiba ai jait sha ka kmie kynthup ïa ka jaitbynriew Khasi hynrei suki suki kitei ki jaitbynriew ki la nang sakma noh namar ka jingai jait noh sha u kpa bad lada ki paitbah ha ka bri u Hynñiewtrep hynñiew skum kin ïa bud bad kohnguh ïa ki jingbatai stad jong kitei ki siej liar khmut ki bym don nongrim tang hapoh san snem ka jaitbynriew Khasi pnar ka la duh jait shisyndon.
U bah Lyngkhoi u la ong ruh ba ka jingkynnoh ba ki kynthei Khasi ki dei kiba im lyngkar ka long ka bym lah satia ban pdiang ha ka imlang sahlang namar kumba ka long mynta ki shynrang ki bym leit skul bad ki bym ïoh kam sorkar ki kyrshan ïa ka ïng ka sem bad pha skul ïa ki khun da kaba leit bylla sha ki jaka ba jngai katba ka kmie pat ka hap ban shong ha ïng ban sumar ïa ki khun ban aibuiñ ïa kiba dang khunlung eh.
Nalor kata u la ong ba lada yn ai jait noh sha u kpa kan pynklumat haduh katta katta ha ka shongkha shongman namar lada u lok ba nyngkong jong kano kano ka longkmie uba dei na kawei ka jait u khlad noh ha ka por ba dang don khun tang uwei bad lada kan shongkurim biang ïa uwei pat u bym dei na kajuh ka jait jong u lok ba nyngkong ka kmie ka dei tang kawei katba ki khun pat ki don ar jait .
Nalor kata lada jia ba u lok ba ar u phet ne u khlad noh bad ka shongkurim biang sa da uwei pat uba dei na kawei pat ka jait ka mut ba na kawei ka long ïng kin don laingut shi para trai katba ka jait pat la ka jong ka jong te hato ka lah ban longï.
Khatduh eh u bah Lyngkhoi u la ong ba ha kaba ïadei bad katei ka phang ki paitbah ka West Khasi Hills ki la dei ban pyrkhat bha bad u la buh jingkylli ruh ïa ki Kñi rangbah jong ki kur ki jait bapher bapher hapoh West Khasi hills la ki sngew dei ne em ban shu shah kren jem daw ba “ka reng ki Kñi ka la kheiñ” ha ki ba kam ba ki dei kiba tip riti tip dustur bad kiba bat hok ïa kata ka jutang blei bad lada ki sngew dei ban shu shah kren sin kren jem daw ka shong ha ki tangba mynta ka la dei ka por ba ki longkmie ,longkpa , ki long Kñi , ki meikha ,ki meinah ki meisan ban mihpyrthei bad ban ïeng pyrshah ïa ka jingpynsgewthuh bakla bad ki jinghikai khonpong jong ki.