Nongstoiñ, Kyllalyngkot 04: Ka kur Nongrem lyngba ka dorbar jong ka kurbah baroh kawei ïa kaba la pynlong ha ka shnong Nongjyndiang West Khasi Hills, ka la ïatai sani bha haba ïadei bad ka kam kur kam kha, kumno ban lum lang bad ban pynïatylli ïa la ka kur bad ban ïakhan bha ïa ka shongkha shongman, khnang ban lait ruh na ka shong ma shong sang.
Ha katei ka dorbar bah, ka kur Nongrem ka la ïoh ruh ban pynkup burom ïa la ki khun ki ksiew kiba la wan shakhmat ha ki jingpule bapher bapher, kaba long ruh kum shi bynta ban ai mynsiem bad ban pynshlur ïa la ki khun ki hajar ba kin minot ha ka pule puthi.
Hadien katei ka jingïalang u bah Manstudy Nongrem kum u nongaibuit jong ka kurbah Nongrem, haba ai jingkren bad u nongthoh khubor u la kyrpad jur ïa la ki kur kiba la kum thoh bakla ïa ka jait Nongrem sha ka Nongrum, ba kin pynbeit noh mardor. Ka kur kan ïakren ban ïatai sani ruh bad ka kur Nongrum ba kin dup tip ba la don ki khun ki hajar na ka kur Nongrem kiba la leit ai ne thoh Nongrum.
Haba bynrap da u bah Spasterlin Nongrem Secretary ka kur Nongrem, u la ong ba ka kur ka wer ka kyntu ban pynbeit noh mardor khnang ban lait na ka sang ka ma, bad ki kur Nongrem kiba la leit thoh Nongrum, kin mad jingeh lada ka kur Nongrum ruh kam pdiang ïa ki hadien ynda ki la ïit bniah bad shem ne lap ba kim dep ki kur lajong. Hynrei ki la shu leit kam kur khlem nongrim, hangta ha kata ka por lada ki thmu ban wan phai ruh kan eh namar ki la mih hi bad haba kumta shaei kin leit.
