Nongpoh, K’lyngkot 04: Ka Dorbar Shnong jong ka shnong Mawtnum mynta ka sngi kala pynlong da ka jingbam khana shnong jong baroh ki paidbah nongshong shnong naduh ki longkmie longkpa, ki khun samla jong ka shnong bad ki heprit shibynta ban wanrah ka jingïeid bad jingtylli hapdeng ki para nongshong shnong.
Ïa katei ka bam khana shnong la wan ban pynshngaiñ da ka jingdonlang u Dr. C Lyngdoh MLA ka Umsning, ki riew rangbah ba kynthup ïa u Bah Successful Lyngdoh, Bah Rocky Marweiñ, Bah Badhok Nongmalieh Rangbah Shnong Mawtnum bad kiwei.
Naka liang ka shnong ha katei ka sngi kum ka jingai mynsiem ïaki khun samla jong ka shnong kala sam ruh da ki khusnam sha 4ngut ki samla jong ka shnong kiba la wan shakhmat bad pyndep ïaki jingpule bapher bapher.
Haba kren ha katei ka sngi naka liang u Dr C Lyngdoh u la pynpaw ka jingsngewkmen kaba khraw ban don bynta bad ka shnong Mawtnum ha katei ka sngi, kaba dei ka sngi lehkmen jong ka shnong ban pdiang ïa u snem thymmai ba dap jingkyrkhu ryngkat ka koit ka khiah ban long ruh u snem ba kmen bad ba dap ba biang, ba kum ka shnong kan lehkmen da ka jingïeid bad jingkmen ha katei ka sngi.
U la ai mynsiem ruh ïaki khun samla ha katei ka sngi kumba ka shnong kala pynkhreh da ki khusnam sha kiba la pass bha bad pyndep ïaki jingpule bapher bapher ba kin nang ïai leh bha bad ruh ban dang trei shitom namar ym don hi ki ban lah ban ïarap lada kum ki briew shimet kim don ka mon, bad kyrmen skhem ba kitei ki samla ba la shah pynkup burom kin dang kiew shaphrang haka jingim bad poi shaka thong kumba ki angnud.
