Ïakynduh ka HANM ïa u DC ka EJHD halor ka jingthmu ban pynlong ïa ka Job Recruitment Mela ha Shillong

By Mawphor News Desk On Jan 5, 2024

Khliehriat Kyllalyngkot 04: U Chairman Employment Cell jong ka Hynñiewtrep Achik National Movement Central Body, u bah Wyraiwan sohtun lem bad ki dkhot ka seng mynta ka sngi ki la ïakynduh ïa u Deputy Commissioner ka East Jaiñtia Hills District, u Abhilash Baranwal, IAS bad ki la pynpaw ha u ïa ka jingthmu jong ka seng ban pynlong noh da ka Mela kaba kyrpang kaba ïadei bad ka thungkam thung jam, kaba ju tip kum ka Job Recruitment Mela hapoh ka jylla hi baroh kawei, la thmu ban pynlong ïa kane ka mela ha u bnai ïaiong 2024, kane ka dei na ka bynta ka jingthungkam ha ki company ne kino kino ki shlem treikam jong ki briew shimet lane ki private Sector.
U bah Sohtun u la pynpaw ka jingsngew khia halor ka jingbym iohkam ioh jam ki samla wad kam ha ki company bad ha kino kino ki private sectors bad ong ruh ba lada ki ioh ïa ki kam ruh ki ioh tang ki kam ba rit ba ria katba ki kam ba heh pat la bat lut da ki briew kiba na bar ka jylla.
Haba kren sha ki pathai khubor, u bah Sohtun u la ong “Ka HANM na ka por sha ka por ka la kyntu ïa ka sorkar ba ka dei ban thungkam thung jam ïa ki khynnah samla ha kino kino ki private sector bad hapoh ki company kiba don hapoh ka jylla jong ngi, hynrei haduh mynta ngi ïohi ba ka sorkar jylla ka la shu leh klet ïa kane ka mat kaba dei ka daw bah jong ki khynnah samla jong ka jaitbynriew jong ngi, na ka liang ka seng HANM ka la shim noh da kawei ka lynti kaba ha une u bnai ïaiong 2024 kan pynlong noh da kane ka Job Recruitment Mela ha nongbah Shillong bad ki company kiba don ha kylleng ki jaka hapoh ka jylla Meghalaya ki dei ban wan ba kin pyni haduh katno tylli kita ki kam ki jam kiba lait hapoh ki company jong ki ba kin lah ban jied ïa ki briew kiba paka tam ban thungkam ha ki company ki jong ki, kine ki company ki lah ban dei ki shlem ai jinghikai (Educational institution) lane kino kino ki company kiba doh hapoh ka jylla”
U la ong ba ka jingwan iakynduh ka jong u lem bad ki dkhot ka seng ïa u Deputy Commissioner ka East Jaiñtia Hills District, ka long ba ka seng ka pan ka jingiarap lem na u DC bad kyrpad ïa u ba un sngewbha ban pynkren lem ïa ki company kiba don hapoh East Jaiñtia Hills District ba kin phah ïa ki kaiphot halor ka jinglait kam hapoh ki company jong ki khnang ba kito ki kam kiba lait ym dei shuh ba ka company kan shu thung katba mon da ka jingstad jong ka hynrei ka dei ban da pyntip sha ki samla baroh kiba don hapoh ka jylla khnang ba ki samla kiba dei hok ban ioh ïa kata ka kam.
U bah Sohtun, u la iathuh ruh ba ha ka jingiakren bad u Deputy Commissioner, u DC u la ai mynsiem bad ong ba kin ïaid shakhmat ha kaba na ka liang jong u kum u DC ïa kaei kaba u lah ban iarap un iarap bad ïa kaei kaba dei ban leh na ka liang ka seng HANM pat ka long ban nang pynbor shuh shuh ïa ka sorkar bad na ka liang ka seng ngin leh ïa kaba donkam.
U Working President HANM East Jaiñtia Hills District, u bah Mihsalan Tho, u la ong ba kane ka jingwan iakynduh ka seng ïa u Deputy Commissioner ka dei namar ba ka seng ka la iohi ba baroh kine ki company kiba don hapoh Meghalaya kim biang bha ka rukom thungkam ïa ki trai jylla, bun ki samla kiba la pyndep ïa ki jingpule kiba shalor ruh kim iohkam ha ki company, namar ba ki company ki thep kam tang ïa ki briew kiba dei ki bar jylla kiba wan nangno nangno, u bah Tho u la kynthoh jur ruh ba ka jingai kam ki company ïa ki trai jylla ruh ki la shu ai tang da ki kam kiba rit ba ria, kum ka kam sar ïing, ka kam rah sha ha ophis, hynrei kim ju iohlad ban ioh ïa ka kam kum ki manager lane kino kino ki kyrdan kiba heh.
Utei u nongïalam ka HANM na East Jaiñtia Hills District, u kyntu jur ïa u Deputy Commissioner ba un sngewbha ban peit lem halor kane khnang ba ki samla kiba la pyndep ïa ka jingpule kin ioh kam lem ha ki company kaba katkum ki kyrdan pule ba ki la dep pyndep.
Ha kane ka jingleit kynduh ka HANM ïa u DC ka East Jaiñtia Hills District, la synran lang ruh da u General Secretary HANM East Jaiñtia Hills District, u bah Commingsoon Dkhar lem bad ki dkhot na ka central body.