Nongpoh, K’lyngkot 17: Kum shi bynta ban sei madan ïa ki khun samla donsap ha ka kam shad ba bun kim ioh lad ban sei madan wat la ki don ïa kata ka sap shad kyrpang ha ka jingim, ka kynhun ki Longkmie na ka shnong Mawroh ba la tip kum ka “Mawroh Women Social Welfare Organization” ha ka sien kaba nyngkong ki la rai ban pynlong da ka jingïakop shad na ka bynta ban sei madan ïa ki samla don sap ha ka kam shad.
Kumba la ïathuh da ka Kong Margret Rymbai, kaba dei ka president katei ka kynhun, ka la pyntip ba ïa kane ka jingïakop shad la rai ban pynlong ha ka 26 tarik u Kyllalyngkot 2024 naduh ka por 2 baje noh phai sngi ha Parish Hall, Nongpoh.
Ka la pyntip paidbah ruh kum ka jingai mynsiem ïa ki khun samla, na ka liang kane ka kynhun ka la pynkhreh ruh ïa ki khusnam pisa sha ki khun samla kiba jop ha kane ka jingïakop shad.
Shuh shuh, ka la bynrap ruh da kaba ong, ba ka jingpynlong ïa kane ka jingïakop shad kam dei satia tang ban ailad ïa ki khun samla donsap, hynrei na ka liang kane ka kynhun ka pyrshang ruh ban trei shitom na ka bynta ban pynmih pisa na ka bynta kane ka kynhun kaba don ka jingthmu ban trei shibun ki kam na ka bynta ban kyntiew lang ïa ka imlang ka sahlang. Kumta na ka liang ka kynhun ka khot ka wer ïa ki samla kiba don ka jingangnud ban shim bynta ha kane ka jingïakop shad ba kin wan ban pynrung kyrteng da kaba kynduh ïa ki nongïalam bad ban tip ruh kham bniah halor kiwei kiwei ki kyndon kiba shim bynta ha kane ka jingïakop shad.
